ଡେମୋ ନାଁରେ ପୋଲିସକୁ ବୋକା ବନେଇଲା ଅଭିଯୁକ୍ତ ଗୋପାଳ ଦାସ, ପ୍ରକୃତ ହତ୍ୟାକାଣ୍ଡ ଘଟଣା ସହ ମେଳ ଖାଉନି ସିନ୍ ରିକ୍ରିଏସନର ଏକାଧିକ ଦୃଶ୍ୟ
ଓଡ଼ିଆ ଗସିପ ବ୍ୟୁରୋ: ମନ୍ତ୍ରୀ ନବ ଦାସଙ୍କ ହତ୍ୟା ଘଟଣା ସହ ସମ୍ପୃକ୍ତ ଥିବା ଦୁଇଟି ଚିତ୍ର । ଗୋଟିଏ ଜାନୁୟାରୀ ୨୯ ତାରିଖର ଚିତ୍ର । ଆଉ ଗୋଟିଏ ଫେବୃୟାରୀ ୭ ତାରିଖର । ଅସଲି ଗୁଳିକାଣ୍ଡ ଏବଂ ନକଲି ପୁନରାବୃତ୍ତି ବା ରିକ୍ରିଏସନ୍, ଭିତରେ ଥିବା ଫରକ୍, ଜଳଜଳ ହୋଇ ଦେଖାଯାଉଛି ।
ଯେଉଁ ଦିନ ମନ୍ତ୍ରୀଙ୍କ ଉପରେ ଗୁଳିମାରିଥିଲା ଅଭିଯୁକ୍ତ, ଫାଏରିଂ କରିସାରିବା ପରେ ତୁରନ୍ତ ପଛକୁ ଦୌଡ଼ିଥିଲା । ଅଳ୍ପ କିଛି ଦୂର ଧାଇଁଯିବା ପରେ ପଛକୁ ଦେଖିଥିଲା । କିନ୍ତୁ ଘଟଣାର ଡେମୋ ବେଳେ କେମିତି ଡ୍ରାମା କରିଛି ଗୋପାଳ । ସିନ୍-ରିକ୍ରିଏସନ୍ ସମୟରେ ଗୁଳି ମାରିବା ପରେ ବନ୍ଧୁକ ଉପରକୁ ଉଠାଇ ଫିଲ୍ମ ଷ୍ଟାଇଲରେ ଏକ ପ୍ରକାର ପୋଜ୍ ଦେଉଛି ଅଭିଯୁକ୍ତ ।
ଅଧିକ ପଢ଼ନ୍ତୁ : ଏୟାରପୋର୍ଟରେ ଖବରକାଗଜରେ ନିଜ ଫଟୋ ଦେଖି ହସି ଉଠିଲେ ଗୋପାଳ, ଏସବୁ ଦେଖି କିଛି ଏପରି ନିଷ୍ପତି ନେଲେ ମନୋସ୍ତତ୍ତ୍ୱବିତ୍
କ୍ରାଇମବ୍ରାଞ୍ଚ ଦ୍ୱାରା କରାଯାଇଥିବା ସିନ୍ ରିକ୍ରିଏସନ୍ ବେଳେ ଅଭିଯୁକ୍ତ ଗୋପାଳ, ଆବଶ୍ୟକତା ଠାରୁ ଅଧିକ ଆକ୍ସନ କରୁଥିବା ସ୍ପଷ୍ଟ ବାରି ହେଉଛି । ବଡ଼ କଥା ହେଉଛି- ଅଭିଯୁକ୍ତ ନିଜେ ଜଣେ ପୋଲିସ୍ ଅଧିକାରୀ ହୋଇଥିବାରୁ, ତଦନ୍ତକୁ କିପରି ବାଟବଣା କରାଯାଏ, ସେ କଥା ହୁଏତ ଗୋପାଳକୁ ବେଶ ଜଣା ।
ପ୍ରଶ୍ନ ହେଉଛି- ସତକୁ ଲୁଚାଇବା ପାଇଁ ତଦନ୍ତକୁ ଗୋଲ ଗୋଲ ବୁଲାଉଛି କି ଅଭିଯୁକ୍ତ ଗୋପାଳ? ଏପଟେ ମନ୍ତ୍ରୀ ନବ ଦାସଙ୍କ ହତ୍ୟା ଘଟଣାକୁ ୧୦ ଦିନ ବିତି ଯାଇଥିଲେ ବି ମର୍ଡର ପଛର କାରଣ ଖୋଜି ପାଉନି କ୍ରାଇମବ୍ରାଞ୍ଚ । ଆଜି କ୍ରାଇମ ସ୍ପଟରେ ପହଞ୍ଚି ତଦନ୍ତର ଅନୁଧ୍ୟାନ କରିଛନ୍ତି ରାଜ୍ୟ ପୋଲିସ ମୁଖିଆ ସୁନିଲ ବଂଶଲ ଏବଂ ତଦନ୍ତର ତଦାରଖ କରୁଥିବା ଜଷ୍ଟିସ୍ ଜେପି ଦାସ ।
ଜଷ୍ଟିସ୍ ଦାସ କହିଛନ୍ତି- ତଦନ୍ତ ଠିକ ବାଟରେ ଚାଲିଛି । ସିନ-ରିକ୍ରିଏସନ୍ ତଦନ୍ତରେ ସହଯୋଗ କରିବ ବୋଲି ସେ କହିଛନ୍ତି । ତେବେ ମାନସିକ ରିପୋର୍ଟ ଆସିଲେ ପରବର୍ତୀ ପଦକ୍ଷେପ ନିଆଯିବ ବୋଲି କହିଛନ୍ତି ଜଷ୍ଟିସ୍ ଜେପି ଦାସ ।
ଏସବୁ ଭିତରେ ପୁଣି ଥରେ ଅଭିଯୁକ୍ତ ଗୋପାଳକୁ ୫ ଦିନିଆରେ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ । ତୃତୀୟ ପର୍ଯ୍ୟାୟରେ ୫ଦିନ ରିମାଣ୍ଡରେ ନେବାକୁ ଅନୁମତି ଦେଇଛନ୍ତି ଝାରସୁଗୁଡ଼ା ଜେଏମଏଫସି କୋର୍ଟ ।
ଏହି ରିମାଣ୍ଡ ଅବଧି ଭିତରେ ଗୋପଳ ମୁହଁରୁ ସତ ଓଗାଳିବା ପାଇଁ ତାର ନାର୍କୋ ଓ ପଲିଗ୍ରାଫ ଟେଷ୍ଟ କରାଯାଇ ପାରେ ବୋଲି ସୂଚନା ମିଳିଛି । ପୂର୍ବରୁ ପ୍ରଥମ ପର୍ଯ୍ୟାୟରେ ୩ ଦିନ ଓ ଦ୍ୱିତୀୟ ପର୍ଯ୍ୟାୟରେ ୪ ଦିନିଆ ରିମାଣ୍ଡରେ ନେଇ ତଦନ୍ତ କରିଛି କ୍ରାଇମବ୍ରାଞ୍ଚ । ହେଲେ ଏଥିରୁ ହତ୍ୟାକାଣ୍ଡର ରହସ୍ୟ ଭେଦିବାକୁ ସକ୍ଷମ ହୋଇନି ତଦନ୍ତକାରୀ ଟିମ ।
Share this story
