ସାବଧାନ! ୬ ଘଣ୍ଟାରୁ କମ୍‌ ଏବଂ ୮ ଘଣ୍ଟାରୁ ଅଧିକ ଶୋଉଥିଲେ ଆପଣ ଶୀଘ୍ର ହୋଇଯିବେ ବୁଢା, ଅଧ୍ୟୟନରୁ ଖୁଲାସା

ଓଡ଼ିଆ ଗସିପ ବ୍ୟୁରୋ (ସ୍ୱତନ୍ତ୍ର ପ୍ରତିନିଧି, ଭୁବନେଶ୍ୱର): ରାତିରେ ବହୁତ କମ୍‌ ଶୋଇବା କିମ୍ବା ଆବଶ୍ୟକତାଠାରୁ ଅଧିକ ଶୋଇବା କେବଳ ଶରୀରରେ କ୍ଲାନ୍ତି ବଢ଼ାଇ ନଥାଏ, ବରଂ ଏହା ଦ୍ୱାରା ଶରୀରର ଅନେକ ଗୁରୁତ୍ୱପୂର୍ଣ୍ଣ ଅଙ୍ଗର ବୟସ ମଧ୍ୟ ଦ୍ରୁତ ଗତିରେ ବୃଦ୍ଧି ପାଇଥାଏ। ପ୍ରସିଦ୍ଧ ବୈଜ୍ଞାନିକ ପତ୍ରିକା ‘ନେଚର୍‌’ (Nature Journal) ରେ ପ୍ରକାଶିତ ଏକ ନୂତନ ଗବେଷଣାରୁ ଏହି ଆଶ୍ଚର୍ଯ୍ୟଜନକ ଦାବି କରାଯାଇଛି। ରିପୋର୍ଟ ଅନୁଯାୟୀ, କମ୍‌ କିମ୍ବା ଅଧିକ ଶୋଇବା ଫଳରେ ଆମର ମସ୍ତିଷ୍କ (Brain), ହୃଦୟ (Heart), ଫୁସଫୁସ ଏବଂ ରୋଗ ପ୍ରତିରୋଧକ ଶକ୍ତି (Immune System) ଉପରେ ଏହାର ବହୁତ ଖରାପ ପ୍ରଭାବ ପଡ଼ିଥାଏ।

ଏହି ଅଧ୍ୟୟନ ଅନୁସାରେ, ଯେଉଁ ଲୋକମାନେ ପ୍ରତିଦିନ ପ୍ରାୟ ୬.୪ ରୁ ୭.୮ ଘଣ୍ଟା ଶୋଇଥାନ୍ତି, ସେମାନଙ୍କ କ୍ଷେତ୍ରରେ ଏହି ବିପଦ ସବୁଠାରୁ କମ୍‌ ଦେଖାଯାଇଛି।

କଲମ୍ବିଆ ୟୁନିଭର୍ସିଟିର ଆସିଷ୍ଟାଣ୍ଟ ପ୍ରଫେସର ଅଫ ରେଡିଓଲୋଜି ‘ଜୁନହାଓ ୱେନ’ ଏହି ଗବେଷଣାର ନେତୃତ୍ୱ ନେଇଥିଲେ। ସେ କହିଛନ୍ତି, "ଆମର ଏହି ଗବେଷଣା ଦର୍ଶାଉଛି ଯେ ବହୁତ କମ୍‌ କିମ୍ବା ବହୁତ ଅଧିକ ଶୋଇବା ଦ୍ୱାରା ଶରୀରର ପ୍ରତ୍ୟେକ ଅଙ୍ଗର ବୟସ ବଢ଼ିବାର ଗତି (Aging Speed) ଦ୍ରୁତ ହୋଇଯାଏ। ଏଥିରୁ ସ୍ପଷ୍ଟ ହେଉଛି ଯେ, ମସ୍ତିଷ୍କ ଏବଂ ସମଗ୍ର ଶରୀରକୁ ସୁସ୍ଥ ରଖିବା ପାଇଁ ଭଲ ନିଦ ଅତ୍ୟନ୍ତ ଜରୁରୀ।"

ଅଧିକ ପଢ଼ନ୍ତୁ : ୟୁକ୍ରେନର ଡ୍ରୋନ ମାଡ଼ରେ ଓଡ଼ିଆ ଯୁବକଙ୍କ ମୃତ୍ୟୁ: ଚାକିରି ପାଇଁ ଯାଇଥିଲେ ରୁଷ

ବିଜ୍ଞାନୀମାନେ ଶରୀରର ବୟସ ବୃଦ୍ଧି ପ୍ରକ୍ରିୟାକୁ ମାପିବା ପାଇଁ ମେସିନ ଲର୍ଣ୍ଣିଂ ଟେକ୍ନୋଲୋଜିର (Machine Learning Technology) ବ୍ୟବହାର କରିଥିଲେ। ଏହି ଟିମ୍‌ ଶରୀରର ୧୭ଟି ଭିନ୍ନ ଭିନ୍ନ ଅଙ୍ଗ ପାଇଁ ୨୩ଟି ବାୟୋଲୋଜିକାଲ କ୍ଲକ (Biological Clocks) ପ୍ରସ୍ତୁତ କରିଥିଲେ। ଏହି କ୍ଲକଗୁଡ଼ିକରେ ମେଡିକାଲ ସ୍କାନ, ରକ୍ତ ପରୀକ୍ଷା ଏବଂ ଶରୀରର ପ୍ରୋଟିନ ସହ ଜଡ଼ିତ ସୂଚନା ସାମିଲ କରାଯାଇଥିଲା, ଯାହା ଦ୍ୱାରା ଜଣାପଡ଼ିଥିଲା ଯେ ଜଣେ ମଣିଷର ଅଙ୍ଗଗୁଡ଼ିକ ତାର ପ୍ରକୃତ ବୟସ ତୁଳନାରେ କେତେ ଶୀଘ୍ର ବୁଢ଼ା ହେଉଛନ୍ତି।

ଏହି ଅଧ୍ୟୟନ ପାଇଁ ‘ୟୁକେ ବାୟୋବ୍ୟାଙ୍କ’ (UK Biobank) ର ପ୍ରାୟ ୫ ଲକ୍ଷ ଲୋକଙ୍କ ସୱାସ୍ଥ୍ୟ ତଥ୍ୟର ବିଶ୍ଳେଷଣ କରାଯାଇଥିଲା। ଗବେଷଣାରୁ ଏକ ’ୟୁ-ସେପ’ (U-Shape) ପ୍ୟାଟର୍ଣ୍ଣ ସାମ୍ନାକୁ ଆସିଛି। ଅର୍ଥାତ୍‌ ଯେଉଁମାନେ ପ୍ରତିଦିନ ୬ ଘଣ୍ଟାରୁ କମ ଶୋଉଥିଲେ ଏବଂ ଯେଉଁମାନେ ୮ ଘଣ୍ଟାରୁ ଅଧିକ ଶୋଉଥିଲେ, ଏହି ଉଭୟ ଶ୍ରେଣୀର ଲୋକଙ୍କ ଅଙ୍ଗଗୁଡ଼ିକ ଶୀଘ୍ର ବୁଢ଼ା ହେଉଥିବା ଜଣାପଡ଼ିଛି। ସବୁଠାରୁ ସୁସ୍ଥ ବା ଆଦର୍ଶ ନିଦର ସମୟ ପ୍ରାୟ ୭ ଘଣ୍ଟା ବୋଲି କୁହାଯାଇଛି।

ଅଧିକ ପଢ଼ନ୍ତୁ : Milk Tea Or Black Tea Benefits: କ୍ଷୀର ଚା’ ନା ବ୍ଲାକ ଟି? କେଉଁଟି ସ୍ବାସ୍ଥ୍ୟ ପାଇଁ ଅଧିକ ଲାଭଦାୟକ ? ଜାଣନ୍ତୁ ...

ଯେଉଁମାନେ କମ୍‌ ଶୋଉଛନ୍ତି ସେମାନଙ୍କଠାରେ ଡିପ୍ରେସନ (ଅବସାଦ), ଏଙ୍ଗଜାଇଟି (ଚିନ୍ତା), ମୋଟାପଣ, ଟାଇପ-୨ ମଧୁମେହ (Diabetes), ହାଇ ବ୍ଲଡ ପ୍ରେସର ଏବଂ ହୃଦରୋଗର (Heart Disease) ଆଶଙ୍କା ଅଧିକ ଦେଖାଯାଇଥାଏ। ସେହିପରି ବୟସ୍କ ଲୋକଙ୍କ କ୍ଷେତ୍ରରେ କମ୍‌ ନିଦ ସିଧାସଳଖ ଭାବେ ଡିପ୍ରେସନ ବଢ଼ାଇଥାଏ। ସେହିପରି ଅଧିକ ସମୟ ଶୋଇବା ଦ୍ୱାରା ମସ୍ତିଷ୍କ ଏବଂ ଶରୀରର ଚର୍ବିରେ (Body Fat) ପରିବର୍ତ୍ତନ ଆସିଥାଏ, ଯାହା ପରୋକ୍ଷରେ ଡିପ୍ରେସନର କାରଣ ସାଜିଥାଏ। କମ୍‌ ଏବଂ ଅଧିକ ଶୋଇବା ଉଭୟ ଅଭ୍ୟାସ ଫୁସଫୁସ ଜନିତ ରୋଗ ଯେପରିକି ସିଓପିଡି (COPD) ଏବଂ ଆଜ୍ମା ସହିତ ଜଡ଼ିତ। ଏହା ବ୍ୟତୀତ ପେଟ ସମସ୍ୟା ଯେପରିକି ଏସିଡ ରିଫ୍ଲକ୍ସ (Acid Reflux) ର ବିପଦ ମଧ୍ୟ ବଢ଼ିଥାଏ।

ବିଜ୍ଞାନୀମାନଙ୍କ ମତରେ, କମ୍‌ ଏବଂ ଅଧିକ ଶୋଉଥିବା ଦୁଇ ପ୍ରକାରର ଲୋକଙ୍କ ପାଇଁ ଅଲଗା ଅଲଗା ସ୍ବାସ୍ଥ୍ୟ ସେବାର ଆବଶ୍ୟକତା ପଡ଼ିପାରେ। ଯଦିଓ ଏହି ଅଧ୍ୟୟନ ସମ୍ପୂର୍ଣ୍ଣ ରୂପେ ପ୍ରମାଣ କରୁନାହିଁ ଯେ କେବଳ ନିଦ ହିଁ ଶରୀର ଶୀଘ୍ର ବୁଢ଼ା ହେବାର ଏକମାତ୍ର କାରଣ, ତଥାପି ବୟସ ବଢ଼ିବା ସହିତ ଶରୀରକୁ ସୁସ୍ଥ ରଖିବା ପାଇଁ ସଠିକ୍‌ ଶୋଇବା ଅଭ୍ୟାସ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ ବୋଲି ଗବେଷକମାନେ ପ୍ରକାଶ କରିଛନ୍ତି।