ଘୋଷଣା ହେଲା ୫ ରାଜ୍ୟର ବିଧାନସଭା ନିର୍ବାଚନ ତାରିଖ; ଜାଣନ୍ତୁ କେଉଁଠି କେବେ
![Five state fight](https://odiagossip.com/static/c1e/client/83534/uploaded/5ac429aefae35f68b0b8d6f129aecda3.jpg)
(କେଉଁ ରାଜ୍ୟରେ କେବେ ହେବ ନିର୍ବାଚନ)
ଉତ୍ତରପ୍ରଦେଶରେ ୭ଟି ଯାକ ପଯର୍ୟାୟରେ ଅର୍ଥାତ୍ ଫେବୃଆରୀ ୧୦, ୧୪, ୨୦, ୨୩, ୨୭, ମାର୍ଚ୍ଚ ୩ ଓ ମାର୍ଚ୍ଚ ୭ରେ ଭୋଟ୍ ଗ୍ରହଣ ହେବ । ଉତ୍ତରାଖଣ୍ଡ, ପଞ୍ଜାବ ଓ ଗୋଆରେ ଗୋଟିଏ ପଯର୍ୟାୟରେ ଫେବୃଆରୀ ୧୪ରେ ଭୋଟ୍ ହେବ । ମଣିପୁରରେ ୨ଟି ପଯର୍ୟାୟରେ ଫେବୃଆରୀ ୨୭ ଓ ମାର୍ଚ୍ଚ ୩ରେ ହେବ ମତଦାନ । ତାରିଖ ଘୋଷଣା ସହ ଆଜି ଠାରୁ ଆଦର୍ଶ ଆଚରଣ ବିଧି ଲାଗୁ ହୋଇଛି ।
ନିରାପଦ ନିର୍ବାଚନ । ସେଥିପାଇଁ ଜାନୁଆରୀ ୧୫ ଯାଏଁ ପ୍ରଚାର ପାଇଁ କୌଣସି ପ୍ରକାର ରାଲି, ରୋଡ୍ ସୋ, ଶୋଭାଯାତ୍ରା, ସାଇକେଲ୍, ବାଇକ୍ କିମ୍ବା ଗାଡ଼ି ରାଲି ହୋଇପାରିବ ନାହିଁ । ବିଜୟ ଶୋଭାଯାତ୍ରା ଉପରେ ମଧ୍ୟ କଟକଣା ଲାଗିଛି । ଡୋର୍-ଟୁ-ଡୋର୍ କ୍ଯାମ୍ପେନ୍ରେ ସର୍ବାଧିକ ୫ଜଣ ଯାଇପାରିବେ। ରାତି ୮ରୁ ସକାଳ ୮ ଯାଏଁ କ୍ୟାମ୍ପେନ କର୍ଫ୍ୟୁ ଲାଗିବ । ଏହି ସମୟରେ ପ୍ରଚାର କରିହେବ ନାହିଁ । ୧୫ ତାରିଖ ପରେ ସ୍ଥିତି ଦେଖି ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ମୁଖ୍ୟ ନିର୍ବାଚନ କମିଶନର କହିଛନ୍ତି।
କରୋନା ସଂକ୍ରମଣ ଆଶଙ୍କା କମାଇବାକୁ, ପ୍ରାର୍ଥୀଙ୍କ ପାଇଁ ଅନ୍ଲାଇନରେ ନାମାଙ୍କନ ଦାଖଲର ବିକଳ୍ପ; ୮୦ ବର୍ଷରୁ ଅଧିକ ବୟସ୍କ, ଦିବ୍ଯାଙ୍ଗ ଓ କରୋନା ସଂକ୍ରମିତଙ୍କ ପାଇଁ ପୋଷ୍ଟାଲ୍ ବାଲଟ୍ ବ୍ଯବସ୍ଥା; ବୁଥ୍ ପ୍ରତି ସର୍ବାଧିକ ୧୨୫୦ ଭୋଟର୍ ନିଷ୍ପତ୍ତି ସହିତ ୫ଟି ଯାକ ରାଜ୍ଯରେ ମତଦାନ ଅବଧି ଘଣ୍ଟାଏ ଲେଖାଏଁ ବଢ଼ାଇ ଦିଆଯାଇଛି । ନିର୍ବାଚନରେ ସଂପୃକ୍ତ ସମସ୍ତ ଅଧିକାରୀ ଓ କର୍ମଚାରୀଙ୍କୁ ଫ୍ରଣ୍ଟଲାଇନ୍ ଓ୍ୱାର୍କର୍ ମାନ୍ଯତା ଦିଆଯିବା ସହ ସମସ୍ତ ଯୋଗ୍ଯ ଅଧିକାରୀଙ୍କୁ ପ୍ରିକସନାରୀ ଡୋଜ୍ ଟିକା ଦିଆଯିବ । ତା ଛଡ଼ା ସବୁ ପୋଲିଂ ଷ୍ଟେସନରେ ସାନିଟାଇଜର୍ ଓ ଥର୍ମାଲ୍ ସ୍କାନିଂ ବ୍ଯବସ୍ଥା ରହିବ।
ଏଥିସହ କେବଳ ମହିଳା ଓ କେବଳ ଦିବ୍ୟାଙ୍ଗଙ୍କ ଦ୍ୱାରା ପରିଚାଳିତ ପୋଲିଂ ଷ୍ଟେସନ୍, ସି-ଭିଜିଲ୍ ଏବଂ ନୋ ୟୋର୍ କ୍ଯାଣ୍ଡିଡେଟ୍ ମୋବାଇଲ୍ ଆପ୍, ପ୍ରାର୍ଥୀଙ୍କ ଅପରାଧିକ ମାମଲା ବିବରଣୀ ପ୍ରକାଶ ଆଦି ସଂପର୍କରେ ମଧ୍ୟ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି ନିର୍ବାଚନ ଆୟୋଗ । ଏହି ୫ ରାଜ୍ୟ ନିର୍ବାଚନରେ ମୋଟ ୧୮ କୋଟି ୩୪ ଲକ୍ଷ ଭୋଟର୍ ଭାଗ ନେବେ ।