ବିଜେପି ଟିକେଟ ନେଇ ବିଜେଡିରେ ଯୋଗଦେଲେ କାକଟପୁର ବିଧାୟକ ପ୍ରାର୍ଥୀ ତୁଷାରକାନ୍ତି ବେହେରା

ଭୁବନେଶ୍ୱର: ରାଜନୀତିରେ ସବୁ କିଛି ହେଇପାରେ । କେବେ ବାପା-ପୁଅ ମଧ୍ୟରେ ଲଢେ଼ଇ ତ କେବେ ଭାଇ-ଭାଇ ମଧ୍ୟରେ । ଖାଲି ଏତିକି ନୁହେଁ ଗୋଟେ ଦଳର ଟିକେଟ ପାଇ ମଧ୍ୟ କିଛି ପ୍ରାର୍ଥୀ ଅଫର ମିଳିଲେ ଟିକେଟ ଦେଇଥିବା ଦଳ ଛାଡ଼ି ଅନ୍ୟ ଦଳକୁ ମଧ୍ୟ ଡିଆଁ ମାରନ୍ତି । ଆଜି ଏମିତି କିଛି ଦେଖିବାକୁ ମିଳିଛି । ପଦ୍ମ ଟିକେଟ ଧରି ଶଙ୍ଖ ଶିବିରରେ ଲମ୍ଫ ମାରିଛନ୍ତି କାକଟପୁର ବିଜେପି ପ୍ରାର୍ଥୀ ତୁଷାରକାନ୍ତି ବେହେରା ।

ନିର୍ବାଚନ ଆଉ ମାତ୍ର ଦିନ କେଇଟା ବାକି ରହିଥିବା ବେଳେ ‘ପଦ୍ମ’ ଶିବିରରୁ ଗୋଟିଏ ପରେ ଗୋଟିଏ ଟାଣୁଆ ନେତା ବାହାରିବାରେ ଲାଗିଛନ୍ତି । ନିକଟରେ ଆନନ୍ଦପୁରର ବିଜେପି ବିଧାୟକ ପ୍ରାର୍ଥୀ ଦଳ ଛାଡି ବିଜେଡିରେ ସାମିଲ ହେବା ପରେ ପରେ ଆଜି ବିଜେପିର ଆଉ ଜଣେ ଟାଣୁଆ ନେତା ବିଜେଡିରେ ସାମିଲ ହେବା ଘଟଣା ବିଜେପି ଶିବିରରେ କମ୍ପନ ସୃଷ୍ଟି କରିଛି । ତୁଷାର ନବୀନ ନିବାସ ଆସି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ଶଙ୍ଖ ଧରିଛନ୍ତି ।

ବିଜେଡିର ସ୍ଥାନୀୟ ବିଧାୟକ ପ୍ରାର୍ଥୀ ସୁର ସେଠୀଙ୍କ ସମର୍ଥକଙ୍କ ବିରୋଧରେ ସାମ୍ବାଦିକଙ୍କୁ ଆକ୍ରମଣ କରିବାର ଅଭିଯୋଗ ଆସିଥିଲା । ଜି ମିଡ଼ିଆର ସାମ୍ବାଦିକ ଚନ୍ଦନ ପାଇକରାୟଙ୍କୁ ଆକ୍ରମଣ କରିବା ପଛରେ ସୁର ସେଠୀ ଙ୍କ ହାତ ଥିବା ଅଭିଯୋଗ ହେଉଥିଲା । ପରେ କିନ୍ତୁ ଦଳ ତାଙ୍କୁ ପ୍ରାର୍ଥୀ କରିଥିଲା । ଏବେ ତୁଷାରଙ୍କ ଯୋଗଦାନ ପରେ ସୁରଙ୍କ ଟିକେଟ ବଦଳିବାର ଯଥେଷ୍ଟ ସମ୍ଭାବନା ସୃଷ୍ଟି ହୋଇଛି । ଖୁବଶୀଘ୍ର ଏ ନେଇ ସ୍ପଷ୍ଟ ସୂଚନା ମିଳିବ ।