ଟାଲେଣ୍ଟ ଥିଲେ ପ୍ରଚୁର ରୋଜଗାର ଦେଉଛି ୟୁଟୁବ, ଆପଣ ବି ବନିପାରିବେ ୟୁଟ୍ୟୁବର; ଏମିତି କଲେ ମିଳିବା ଲକ୍ଷାଧିକ ଟଙ୍କା

12

ଓଡ଼ିଆ ଗସିପ୍ ବ୍ୟୁରୋ: ଆଜିକାଲି ୟୁଟ୍ୟୁବ୍ କେବଳ ମନୋରଞ୍ଜନ କି ଶିକ୍ଷା ପାଇଁ ନୁହେଁ ବରଂ ଟଙ୍କା ରୋଜଗାରର ଏକ ପ୍ଲାଟ୍‌ଫର୍ମରେ ପରିଣତ ହୋଇଛି। ସାରା ବିଶ୍ୱରେ ଲକ୍ଷ ଲକ୍ଷ ଲୋକ ୟୁଟ୍ୟୁବର୍ ଭାବରେ କ୍ୟାରିୟର କରୁଛନ୍ତି। କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଭାରତରେ ଏକ ଛୋଟ ଗାଁ ଅଛି ଯାହା ୟୁଟ୍ୟୁବର୍‌ର ଏକ ହବ୍‌ରେ ପରିଣତ ହୋଇଛି। ଏହି ଗାଁର ପ୍ରତି ପରିବାରର ଲୋକ ଅନ୍‌ଲାଇନ୍ ଭିଡିଓ ଶେୟାରିଂ ପ୍ଲାଟ୍‌ଫର୍ମ ପାଇଁ ଭିଡିଓ ପ୍ରସ୍ତୁତ କରୁଛନ୍ତି।

 

ଏହି ଗାଁର ଜନସଂଖ୍ୟାର ପ୍ରାୟ ୩୦% ଲୋକ ୟୁଟ୍ୟୁବର୍ ହୋଇ ରୋଜଗାର ପାଇଁ ଭିଡିଓ ତିଆରି କରନ୍ତି। ଛତିଶଗଡର ରାୟପୁରରେ ଥିବା ତୁଳସୀ ଗାଁରେ ପ୍ରାୟ ୩ ହଜାର ଲୋକ ବାସକରନ୍ତି। ସେମାନଙ୍କ ମଧ୍ୟରୁ ୧ ହଜାର ଲୋକ ୟୁଟ୍ୟୁବ୍ ଭିଡିଓ କରି ଟଙ୍କା ରୋଜଗାର କରୁଛନ୍ତି। ଏହି ଗାଁର ଦୁଇ ବନ୍ଧୁ ଜ୍ଞାନେନ୍ଦ୍ର ଶୁକ୍ଳା ଏବଂ ଜୟ ବର୍ମା ପ୍ରଥମେ ୟୁଟ୍ୟୁବ୍ ଭିଡିଓ କରିବା ଆରମ୍ଭ କରିଥିଲେ।

 

ଏହି ଦୁଇ ବନ୍ଧୁ ୟୁଟ୍ୟୁବ୍ ଚ୍ୟାନେଲ୍ ଆରମ୍ଭ କରିବା ନେଇ ସେମାନଙ୍କ ଚାକିରି ଛାଡିଥିଲେ। ଜ୍ଞାନେନ୍ଦ୍ର ଶୁକ୍ଳା ଏସ୍‌ବିଆଇରେ ନେଟ୍‌ୱର୍କ ଇଞ୍ଜିନିୟର ଭାବରେ କାମ କରୁଥିଲେ। ସେ ୟୁଟ୍ୟୁବ୍ ଭିଡିଓ ଦେଖି ପ୍ରେରଣା ପାଇଥିଲେ ଏବଂ ନିଜର ଭିଡିଓ କରିବାକୁ ନିଷ୍ପତ୍ତି ନେଇଥିଲେ। ବର୍ତ୍ତମାନ ସେ ତାଙ୍କ ଚ୍ୟାନେଲ୍‌ରେ ୨୫୦ରୁ ଅଧିକ ଭିଡିଓ ପ୍ରସ୍ତୁତ କରିଛନ୍ତି। ତାଙ୍କ ଚ୍ୟାନେଲ୍‌ରେ ୧.୧୫ ଲକ୍ଷ ସବ୍‌ସ୍କ୍ରାଇବର ଅଛନ୍ତି।

ରସାୟନ ବିଜ୍ଞାନରେ MSC କରିଥିବା ଜୟ ବର୍ମା ମଧ୍ୟ ଏକ ଘରୋଇ କୋଚିଂ ସେଣ୍ଟରରେ ପାର୍ଟ ଟାଇମ୍‌ ଶିକ୍ଷକ ଭାବରେ କାମ କରୁଥିଲେ। ସେଠାରେ ସେ ମାସକୁ ପ୍ରାୟ ୧୨,୦୦୦-୧୫,୦୦୦ ଟଙ୍କା ପାଉଥିଲେ। କିନ୍ତୁ ୟୁଟ୍ୟୁବ୍‌ରୁ ସେ ଏବେ ପ୍ରାୟ ୩୦,୦୦୦-୩୫,୦୦୦ ଟଙ୍କା ରୋଜଗାର କରୁଛନ୍ତି। ତାଙ୍କୁ ଅନୁସରଣ କରି ଅନ୍ୟମାନେ ମଧ୍ୟ ଭିଡିଓ ତିଆରି କରିବା ଆରମ୍ଭ କରିଥିଲେ। ଏଠାରେ ଏବେ ଛୋଟ ଛୋଟ ଶୋ, କ୍ଷୁଦ୍ର ଚଳଚ୍ଚିତ୍ର ଏବଂ ଅନ୍ୟାନ୍ୟ ଭିଡିଓ ସହିତ ଡିଜିଟାଲ୍ ବିଷୟବସ୍ତୁ ମଧ୍ୟ ତିଆରି ହେଉଛି।

ମହିଳା କଳାକାର ଏବଂ ୟୁଟ୍ୟୁବର୍ ପିଙ୍କି ସାହୁ କହିଛନ୍ତି ଯେ “ଏହି ଗୋଷ୍ଠୀ ଗାଁର ମହିଳାମାନଙ୍କୁ ସଶକ୍ତ କରିବାରେ ସାହାଯ୍ୟ କରିଛନ୍ତି। ମୁଁ ଭିଡିଓ ଆରମ୍ଭ କରିବାର ଦେଢ ବର୍ଷ ହୋଇଗଲାଣି। ଆମର ପ୍ରାୟ ୪୦ଟି ୟୁଟ୍ୟୁବ୍ ଚ୍ୟାନେଲ୍ ଅଛି। ସମସ୍ତେ ଆମ ସହିତ କାମ କରନ୍ତି। ଏଠାରେ ସାଧାରଣତଃ ମହିଳାମାନଙ୍କୁ ଘରୁ ବାହାରକୁ ଯିବାକୁ ଅନୁମତି ଦିଆଯାଇ ନଥାଏ କିନ୍ତୁ ଆମର ୟୁଟ୍ୟୁବ୍ ଚ୍ୟାନେଲ୍ ମାଧ୍ୟମରେ ଆମେ ସେମାନଙ୍କୁ ଅନେକ ସୂଚନା ଦେଇଛୁ ଯେ ମହିଳାମାନେ ମଧ୍ୟ କିଛି କରିପାରିବେ।

ୟୁଟ୍ୟୁବର୍ ସନ୍ଦୀପ ସାହୁ କହିଛନ୍ତି ଯେ ରାମଲୀଳା, ଡ୍ରାମା ଇତ୍ୟାଦି ମାଧ୍ୟମରେ ଗାଁର ଲୋକମାନେ କଳା ସହିତ ଜଡିତ ଥାଆନ୍ତି। ଯୁବକମାନଙ୍କଠାରୁ ବରିଷ୍ଠ ନାଗରିକ ପର୍ଯ୍ୟନ୍ତ ସମସ୍ତେ ଏହି ଅଭିଯାନରେ ସହଯୋଗ କରନ୍ତି। କିନ୍ତୁ ସେମାନଙ୍କୁ ନିଜ ଦକ୍ଷତା ପ୍ରଦର୍ଶନ କରିବାକୁ କୌଣସି ସୁଯୋଗ କିମ୍ବା ସଠିକ୍ ପ୍ଲାଟ୍‌ଫର୍ମ ମିଳୁ ନଥିଲା। ଏହା ବର୍ତ୍ତମାନ ବଦଳିଯାଇଛି। 'ବିଙ୍ଗ୍ ଛତିଶଗଡ଼ିଆ' ନାମକ ଏକ ଚ୍ୟାନେଲର ୧୧୫k(୧ଲକ୍ଷ ୧୫ହଜାର)ରୁ ଅଧିକ ଗ୍ରାହକ ଅଛନ୍ତି, ଏଥିରେ ୨୦୦ରୁ ଅଧିକ କମେଡି ଭିଡିଓ ପଡିଛି।

ଥରେ ସନ୍ଦୀପ ସାହୁ ଏକ ଡାକ୍ତରଖାନାରୁ ଜଣେ ବୃଦ୍ଧ ରୋଗୀ, ଯାହାଙ୍କର ଅବସ୍ଥା ଗୁରୁତର ଥିଲା ତାଙ୍କ ଠାରୁ କଲ୍ ପାଇଲେ। ସେ ତାଙ୍କ ଭିଡିଓକୁ ଖୁବ ଉପଭୋଗ କରିଥିଲେ ଏବଂ କଲ୍ କରି ତାଙ୍କୁ ପ୍ରଶଂସା କରିଥିଲେ। ସେବେଠାରୁ ତୁଳସୀ ଗାଁର ଯୁବକ ୟୁଟ୍ୟୁବର ସେମାନଙ୍କର କମେଡି ଭିଡିଓ ମାଧ୍ୟମରେ ଲୋକଙ୍କୁ ହସାଇବାକୁ ନିଷ୍ପତ୍ତି ନେଇଥିଲେ।

Share this story

World Odia Language Conferene