ଏସିପି ନିକିତାଙ୍କ ମୃତ୍ୟୁ ଘଟଣାରେ ଆସିଲା ନୁଆ ଟ୍ୱି୍ଷ୍ଟ, ‘ମୋ ଝିଅ ମରି ନାହିଁ, ତାକୁ ମାରିଦିଆ ଯାଇଛି’, ବାପା ଆଣିଲେ ଏମିତି ସଙ୍ଗୀନ ଅଭିଯୋଗ
ଭୁବନେଶ୍ୱର: ଟେଲି ସିରିଏଲରେ ଏସିପି ଅଭିନୟ କରୁଥିବା ଅଭିନେତ୍ରୀ ନିକିତାଙ୍କ ମୃତ୍ୟୁ ଘଟଣାରେ ଏବେ ଆସିଛି ନୁଆ ଟ୍ୱି୍ଷ୍ଟ । ଗୋଟେପଟେ ତାଙ୍କ ମୃତ୍ୟୁ ଘଟଣାକୁ ଆତ୍ମହତ୍ୟାର ରୂପ ଦିଆଯାଉଥିବା ବେଳେ ତାଙ୍କ ବାପା ସନାତନ ବେହେରା ଗତକାଲି ଆଣିଛନ୍ତି ସଙ୍ଗୀନ ଅଭିଯୋଗ । ତାଙ୍କ ଝିଅ ଆତ୍ମହତ୍ୟା କରି ନାହିଁ ବରଂ ତାକୁ ମାରିଦିଆ ଯାଇଥିବା ବାପା ଅଭିଯୋଗ ଆଣିଛନ୍ତି । ଏନେଇ ସେ କଟକ ଚାଉଳିଆଗଞ୍ଜ ଥାନାରେ ହତ୍ୟା ଅଭିଯୋଗ ଆଣିଛନ୍ତି ।
ଅନ୍ୟପଟରେ ଅଭିଯୋଗ ଆଧାରରେ ପୁଲିସ ନିକିତାଙ୍କ ସ୍ୱାମୀ ଲିପୁନ ସାହୁଙ୍କୁ ଅଟକ ରଖି ପଚରାଉଚରା କରୁଥିବା ଜଣାପଡିଛି । ଖାଲି ଏତିକି ନୁହେଁ ଲିପୁନଙ୍କ ମା’ଙ୍କୁ ମଧ୍ୟ ପୁଲିସ ଖୋଜୁଥିବା ସୂଚନା ମିଳିଛି । ପୁଲିସ ସୂଚନା ମୁତାବକ, ୨୦୧୬ରେ ନିକିତା କଟକ ଗୋପାଳପୁରର ବାସିନ୍ଦା ଅଭିନେତା ଲିପୁନ ସାହୁଙ୍କୁ ବିବାହ କରିଥିଲେ । ନିକିତାଙ୍କ ୪ମାସର ଏକ ଶିଶୁ ପୁତ୍ର ଅଛି । ବିବାହ ପରେ ସବୁବେଳେ ନିକିତା ମହାନଦୀବିହାର ସ୍ଥିତ ତାଙ୍କ ବାପାଙ୍କ ଘରେ ରହୁଥିଲେ । ସେଠାକୁ ଲିପୁନ ସୁବୁଦିନ ଯିବାଆସିବା କରନ୍ତି ।
ହେଲେ ଗତ ଶନିବାର ରାତିରେ ନିକିତା ମହାନଦୀ ବିହାରରେ ତାଙ୍କ ବାପା, ମା’ ଓ ସ୍ୱାମୀଙ୍କ ସହ ଥିଲେ । ହେଲେ ହଠାତ୍ ଏମିତି କ’ଣ ଘଟିଲା ଯେ, ଛାତରୁ ଖସି ପଡ଼ିଥିଲେ ନିକିତା । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ମହାନଦୀ ବିହାର ସ୍ଥିତ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ ସେଠାରୁ କଟକ ବଡ଼ ମେଡ଼ିକାଲ ଓ ତା’ପରେ ସିଡିଏ ସ୍ଥିତ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ ।
ସୂଚନାଯୋଗ୍ୟ, ନିକିତାଙ୍କ ପ୍ରକୃତ ନାମ ‘ଲକ୍ଷ୍ମୀପ୍ରିୟା’ ଅଟେ, ସେ ଟେଲି ସିରିଏଲ ‘ଏସିପି ନିକିତା’ରେ ନିକିତା ନାଁରେ ଜଣାଶୁଣା ଥିଲେ ।
