ମାନବିକତା ମାରିଦେଲା ମହାମାରୀ, ଭୂତାଣୁ ଭୟରେ କେହି ପାଖ ମାଡ଼ିଲେନି, ଶେଷରେ ସଂକ୍ରମଣରେ ଚାଲିଗଲେ ଏହି ସହରର ଜଣେ ବ୍ୟକ୍ତି

ଓଡ଼ିଆ ଗସିପ୍ ବ୍ୟୁରୋ: କରୋନା କଷଣରେ ଛଟପଟ ହେଉଥିବା ଆଜିର ମାନବ ସମାଜ କଣ ଏତେ ନିଷ୍ଠୁର ହୋଇପାରେ ଯେ, ଅନ୍ଯ ଜଣେ ବିପଦରେ ପଡ଼ିଥିବା ଦେଖି ପଛଘୁଞ୍ଚା ଦେବ ? ବିଶ୍ୱାସ ନହେଲେ ବି ସତ, କାନ ମିଛ ବୋଲି ଶୁଣିବାକୁ ଚାହିଁଲେ ବି ବାରମ୍ବାର ଏହା ସତ ଆଉ ସତ ବୋଲି ଗୁଞ୍ଜରିତ ହେଉଛି । କେମିତି, କାହିଁକି ଜଣେ ନିର୍ଦ୍ଦୟ ହୋଇପାରେ ବୋଲି ଆପଣଙ୍କ ମନରେ ପ୍ରଶ୍ନ ବି ଉଠିପାରେ । କାହିଁକିନା ଏହା ହେଉଛି କରୋନା କାଳର ସବୁଠାରୁ ବଡ଼ ଅପ୍ରିୟ ଓ ନିଷ୍ଠୁର ସତ ଯାହା ମାନବ ସମାଜକୁ ଧିକ୍କାର କରୁଛି ତାକୁ ହତ୍ଯା କରିଛି । ପୂରା ଘଟଣା ସମ୍ପର୍କରେ ଜାଣିବା ପାଇଁ ଆପଣଙ୍କୁ ଧ୍ୟାନର ସହ ଏହି ଖବରଟିକୁ ପଢ଼ିବାର ଆବଶ୍ୟକତା ରହିଛି ।

ରାଜ୍ୟରେ କରୋନାର କଷ୍ଟକୁ ସରକାରୀ ଅବ୍ଯବସ୍ଥା ବଳିଯାଉଛି ା କାହିଁକିନା ଭୂତାଣୁ ବିରୋଧରେ ଲଢ଼େଇ କରିବା ଆଗରୁ ଅବହେଳାରେ ଆଖି ବୁଜିଦେଉଛି ଜଣେ ନିରୀହ ରୋଗୀଟିଏ ା ଏମିତି ଏକ ଚିତ୍ର ସାମ୍ନାକୁ ଆସିଛି ଢେଙ୍କାନାଳ ମେଡ଼ିକାଲ୍ ପରିସରରୁ । ଏଠାରେ ଜଣେ ରୋଗୀଙ୍କ ଅଭାବନୀୟ ମୃତୁ୍ଯଘଟଣା ଆଜି ସାରା ରାଜ୍ଯକୁ ଦୋହଲାଇ ଦେଇଛି। ସମସ୍ତଙ୍କ ଆଖି ଆଗରେ ଜଣେ ବ୍ଯକ୍ତିଙ୍କ ଜୀବନ ଚାଲି ଯାଉଥିଲେ ବି କେହି ସାମ୍ନାକୁ ନ ଆସିିବା ମାନବିକତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି ।  

ଜଣେ ବ୍ୟକ୍ତି କୋଭିଡ୍ ଟେଷ୍ଟ ଅନୁଗୁଳରୁ ଢେଙ୍କାନାଳ ଆସିଥିଲେ । ଟେଷ୍ଟ ପରେ ରିପୋର୍ଟ ପଜିଟିଭ୍ ବୋଲି ଜାଣିବା ପରେ ହଠାତ୍ ମେଡ଼ିକାଲ୍ ସାମ୍ନାରେ ହିଁ ଟଳି ପଡ଼ିଲେ । ପାଖରେ ଥିବା ପତ୍ନୀ ଓ ସମ୍ପର୍କୀୟ ତାଙ୍କୁ ବଞ୍ଚାଇବାକୁ ଅନେକ ଚେଷ୍ଟା କଲେ ମଧ୍ୟ ବିଫଳ ହୋଇଥିଲେ । ଡାକ୍ତର, ନର୍ସଙ୍କୁ କାକୁତି ମିନତି ହୋଇ ଡାକିଥିଲେ ମଧ୍ୟ କେହି କଥା ପଦେ ଶୁଣିନଥିଲେ । ଶେଷରେ ସ୍ତ୍ରୀଙ୍କ ସାମ୍ନାରେ ହିଁ କରୋନା ସଂକ୍ରମଣରେ ସଂକ୍ରମିତ ସ୍ବାମୀ ଆରପାରିକୁ ଚାଲିଗଲେ ।

ଏହାର ଏକ ଭିଡିଓ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ମଧ୍ୟ ହେଉଛି । କିନ୍ତୁ ସବୁ ଭାଇରାଲ ଭିଡିଓ ଭଳି ଏହି ଭିଡିଓ ମଧ୍ୟ ଭିଡ଼ରେ ଉଭେଇ ଯିବ । ନା କେହି ଜାଣିବାକୁ ଥିବେ ନା କେହି ପଚାରିବାକୁ ଥିବ । କିନ୍ତୁ ଦିନେ ନା ଦିନେ ଏହି କରୋନା ବିପତ୍ତି ବେଳର ଏହି ହୃଦୟ ବିଦାରକ ଦୃଶ୍ୟ ମାନବସମାଜ ପାଇଁ ଏକ ଲଜ୍ଜା ହୋଇ ରହିବ ।