ବିଜେପି ନିର୍ବାଚନୀ ଇସ୍ତାହାର ଅବାସ୍ତବ, ଆଦର୍ଶ ଆଚରଣ ବିଧିର ଖୋଲା ଉଲ୍ଲଂଘନ, କାର୍ଯ୍ୟାନୁଷ୍ଠାନ ପାଇଁ ସିଇଓଙ୍କ ପାଖରେ ବିଜେଡ଼ିର ଫେରାଦ
ଭୁବନେଶ୍ୱର: ବିଜେପିର ନିର୍ବାଚନୀ ଇସ୍ତାହାରରେ ଦିଆଯାଇଥିବା ପ୍ରତିଶ୍ରୁତିଗୁଡ଼ିକ ଯୁକ୍ତିସଙ୍ଗତ ନୁହେଁ ଏବଂ ଅବାସ୍ତବ । ଏହା ଆଦର୍ଶ ଆଚରଣ ବିଧି, ୨୦୧୯ର ଧାରା ୧୮.୩.୨ ଅନୁଯାୟୀ ପର୍ଯ୍ୟବେସିତ ନୁହେଁ । ଏହି ଅଭିଯୋଗ ଧରି ମୁଖ୍ୟ ନିର୍ବାଚନ ଅଧିକାରୀଙ୍କ ପାଖରେ ଆଜି ଫେରାଦ ହୋଇଛି ବିଜୁ ଜନତା ଦଳ । ବିଜେପି ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଛି ।
ଆଦର୍ଶ ଆଚରଣ ବିଧି କହୁଛି, ରାଜନୈତିକ ଦଳର ଇସ୍ତାହାରରେ ପ୍ରତିଶ୍ରୁତିର ବାସ୍ତବତା ରହିବ । ଅର୍ଥନୈତିକ ପ୍ରାସଙ୍ଗିକତା ରହିବ । ବାସ୍ତବତା ଉପରେ ପର୍ଯ୍ୟବେସିତ ହୋଇ ଭୋଟରଙ୍କ ବିଶ୍ୱାସଭାଜନ ହେବ । ମାତ୍ର ବିଜେପି ଇସ୍ତାହାରରେ ଏସବୁ ନାହିଁ ବୋଲି ବିଜେଡ଼ି ଦର୍ଶାଇଛି । ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ପ୍ରସଙ୍ଗରେ ବିଜେପି ୨୦୧୪ର ପ୍ରତିଶ୍ରୁତି ପାଳନ କଲାନି । ଏଥର ଇସ୍ତାହାରରେ ଏହାକୁ ବାଦ ଦେଇ ପ୍ରତିଶ୍ରୁତି ପାଳନ କରିପାରିବ ନାହିଁ ବୋଲି ଜଣାଇ ଦେଇଛି । ଏହାଦ୍ୱାରା ବିଜେପି ଭୋଟରଙ୍କ ବିଶ୍ୱାସ ଭାଙ୍ଗିଛି ।
ଏମ୍ଏସ୍ପି ଦୁଇଗୁଣା ବୃଦ୍ଧି ପାଇଁ ୨୦୧୪ରେ ପ୍ରତିଶ୍ରୁତି ଦେଇଥିଲା । ତାହା ପାଳନ ନକରି ୨୦୧୯ ଇସ୍ତାହାରରେ ପୁଣି ଏହାକୁ ସ୍ଥାନିତ କରିଛି । ଏହା ମଧ୍ୟ ଭୋଟରଙ୍କ ପ୍ରତି ବିଶ୍ୱାସଘାତକତା । ଓଡ଼ିଶାର ବଜେଟ୍ ଆକାର ୧.୨ ଲକ୍ଷ କୋଟି ଥିବା ବେଳେ ବିଜେପି ତାର ଇସ୍ତାହାରରେ ଜଳସେଚନ ପାଇଁ ୧ ଲକ୍ଷ କୋଟି ବଜେଟ୍ ର ପ୍ରତିଶ୍ରୁତି ଦେଇ ଅର୍ଥନୀତିକୁ ଆଖିଠାର ମାରିଛି । ୫ ବର୍ଷରେ ୧୫ଟି ବନ୍ଦର ପ୍ରତିଷ୍ଠାର ପ୍ରତିଶ୍ରୁତି ଡାହା ମିଛ । କ୍ଷମତାରେ ଥାଇ ବିଜେପି ଗତ ୫ ବର୍ଷରେ ୫ଟି ବନ୍ଦର ବି ପ୍ରତିଷ୍ଠା କରିପାରିନି । ବାର୍ଷିକ ୨ କୋଟି ଚାକିରି ଓ କର୍ମନିଯୁକ୍ତିର ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ତାହା ଜୁମଲାବାଜି ଥିଲା । ପୁଣି ଏଥର ଇସ୍ତାହାରରେ ରାଜ୍ୟର ସବୁ ପରିବାରକୁ କର୍ମନିଯୁକ୍ତିର ପ୍ରତିଶ୍ରୁତି ଡାହା ମିଛ ଛଡ଼ା କିଛି ନୁହେଁ । ସେହିଭଳି ସହରାଞ୍ଚଳ ବିକାଶ ପାଇଁ ୧ ଲକ୍ଷ କୋଟି ଟଙ୍କାର ବଜେଟ୍ ପ୍ରତିଶ୍ରୁତି ମଧ୍ୟ ମିଥ୍ୟା ଏବଂ ଅଯୁକ୍ତିକର ବୋଲି ବିଜେଡ଼ି ଦର୍ଶାଇଛି ।
୨୦୧୯ ବିଜେପିର ଏହି ଇସ୍ତାହାର ଆଦର୍ଶ ଆଚରଣ ବିଧିର ସମ୍ପୂର୍ଣ୍ଣ ଉଲ୍ଲଂଘନ କରୁଥିବାରୁ କାର୍ଯ୍ୟାନୁଷ୍ଠାନ ପାଇଁ ବିଜେଡ଼ି ମୁଖ୍ୟ ନିର୍ବାଚନ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଛି । ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଥିବା ବିଜେଡ଼ି ପ୍ରତିନିଧି ଦଳରେ ମୁଖପାତ୍ର ଡ. ଲେଲିନ୍ ମହାନ୍ତି, ଡ. ସସ୍ମିତ୍ ପାତ୍ର ଏବଂ ଶ୍ରୀମତୀ ସୁଲତା ଦେଓ ସାମିଲ ଥିଲେ ।