ଜାମ୍ମୁ ଓ କାଶ୍ମୀରରେ ବିପଦରେ ବିହାରୀ: ଖୋଜି ଖୋଜି ଅଣକାଶ୍ମୀରବାସୀଙ୍କୁ ମାରୁଛନ୍ତି ଆତଙ୍କବାଦୀ
ଜାମ୍ମୁ ଓ କାଶ୍ମୀରରେ ବିପଦରେ ବିହାରୀ: ଖୋଜି ଖୋଜି ଅଣକାଶ୍ମୀରବାସୀଙ୍କୁ ମାରୁଛନ୍ତି ଆତଙ୍କବାଦୀ
ଓଡ଼ିଆ ଗସିପ୍ ବ୍ୟୁରୋ: କାଶ୍ମୀରରେ ରହୁଥିବା ବାହାରର ଶ୍ରମିକଙ୍କୁ ସେନା କିମ୍ବା ପୋଲିସ ସୁରକ୍ଷାରେ ଥିବା ଶିବିରକୁ ସ୍ଥାନାନ୍ତର କରାଯିବ । ଏନେଇ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଛି ବୋଲି ଜାମ୍ମୁ ଓ କାଶ୍ମୀର ପୋଲିସ ମୁଖ୍ୟ ବିଜୟ କୁମାର କହିଛନ୍ତି । ବିହାର ଓ ଉତ୍ତରପ୍ରଦେଶ ଭଳି ଅନ୍ୟ ରାଜ୍ୟରୁ ଆସି ଶ୍ରମିକ ଭାବେ କାମ କରୁଥିବା ଲୋକଙ୍କୁ ତୁରନ୍ତ ସୁରକ୍ଷିତ ଶିବିରକୁ ନେବା ଲାଗି ପୋଲିସ କର୍ମଚାରୀଙ୍କୁ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି ।
ଗତକାଲି ୩ ଜଣ ବିହାରୀ ଶ୍ରମିକଙ୍କୁ ଗୁଳି କରାଯାଇଥିବା ବେଳେ ସେମାନଙ୍କ ମଧ୍ୟରୁ ୨ ଜଣଙ୍କର ମୃତ୍ୟୁ ହୋଇଥିଲା । ଏହାପରେ ବାହାରର ଶ୍ରମିକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ଲାଗି ପଦକ୍ଷେପ ନିଆଯାଉଛି । ତେବେ ରାଜ୍ୟରେ ହଜାର ହଜାର ବାହାରିଆ ଶ୍ରମିକ କାମ କରୁଥିବା ବେଳେ, କେତେଜଣଙ୍କୁ ସ୍ଥାନାନ୍ତର କରାଯିବ, ସେନେଇ କିଛି ସ୍ପଷ୍ଟ ସୂଚନା ଦିଆଯାଇ ନାହିଁ ।
ଏହା ପୂର୍ବରୁ ଶନିବାର ଦିନ ପୁଲଓ୍ୱାମାରେ ବିହାରର ଏକ ଗୁପ୍ଚୁପ୍ ବାଲା ଏବଂ ଉତ୍ତରପ୍ରଦେଶର ଜଣେ କାଠ ମିସ୍ତ୍ରୀଙ୍କୁ ମଧ୍ୟ ଆତଙ୍କବାଦୀ ହତ୍ୟା କରିଥିଲେ । ଗତ ୨ ସପ୍ତାହ ଭିତରେ ଆତଙ୍କୀଙ୍କ ଗୁଳିରେ ୧୧ ଜଣ ସାଧାରଣ ନାଗରିକଙ୍କ ମୃତ୍ୟୁ ହେଲାଣି ।
ସେପଟେ ବାରମ୍ବାର ଏଭଳି ଅଣ-କାଶ୍ମିରୀ ଶ୍ରମିକଙ୍କୁ ଟାର୍ଗେଟ୍ କିଲିଂ କରାଯିବା ପରେ ଚିନ୍ତାରେ ଜାମ୍ମୁ-କାଶ୍ମୀର ପୋଲିସ । କାଶ୍ମୀରରେ ଥିବା ସମସ୍ତ ଅଣ-ସ୍ଥାନୀୟ ଶ୍ରମିକଙ୍କୁ ତୁରନ୍ତ ନିକଟସ୍ଥ ଥାନା, CAPF ଓ ସେନା କାର୍ଯ୍ୟାଳୟ କିମ୍ବା କ୍ୟାମ୍ପକୁ ସ୍ଥାନାନ୍ତର କରିବାକୁ ସବୁ ଡିଆଇଜିଙ୍କୁ ଚିଠି ଲେଖିଛନ୍ତି ପୋଲିସ ଆଇଜି ।
ସେପଟେ ବିହାର ମୁଖ୍ୟମନ୍ତ୍ରୀ ନିତିଶ କୁମାର କୁଲଗାମ୍ ଆକ୍ରମଣରେ ୨ ମୃତକଙ୍କ ପରିବାର ପାଇଁ ୨ ଲକ୍ଷ ଟଙ୍କା ଲେଖାଏଁ ଅନୁକମ୍ପାରାଶି ଘୋଷଣା କରିବା ସହ ଜାମ୍ମୁ ଓ କାଶ୍ମୀର ଉପରାଜ୍ୟପାଳ ମନୋଜ ସିହ୍ନାଙ୍କ ସହ କଥା ହୋଇ ଘଟଣା ସଂପର୍କରେ ଚିନ୍ତା ପ୍ରକାଶ କରିଛନ୍ତି ।