୧୩ ମୃତ ସାମ୍ବାଦିକଙ୍କ ପରିବାରକୁ ୪ ଲକ୍ଷ ଲେଖାଏଁ ଆର୍ଥିକ ସହାୟତା ରାଶି ପ୍ରଦାନ କଲେ ଓଡ଼ିଶା ସରକାର

 

ଓଡ଼ିଆ ଗସିପ ବ୍ୟୁରୋ (ଭୁବନେଶ୍ୱର, ସ୍ୱତନ୍ତ୍ର ପ୍ରତିନିଧି): ଓଡ଼ିଶାର କାର୍ଯ୍ୟରତ ସାମ୍ବାଦିକ ଏବଂ ସେମାନଙ୍କ ପରିବାରର କଲ୍ୟାଣ ପାଇଁ ରାଜ୍ୟ ସରକାର ନିଜର ପ୍ରତିବଦ୍ଧତା ଜାରି ରଖିଛନ୍ତି । ଓଡ଼ିଶା କାର୍ଯ୍ୟରତ ସାମ୍ବାଦିକ କଲ୍ୟାଣ ଯୋଜନା ଅଧୀନରେ ମୃତ କାର୍ଯ୍ୟରତ ସାମ୍ବାଦିକଙ୍କ ନିକଟତମ ସମ୍ପର୍କୀୟଙ୍କୁ ସୂଚନା ଓ ଲୋକସମ୍ପର୍କ ବିଭାଗ, ଓଡ଼ିଶା ସରକାରଙ୍କ ପକ୍ଷରୁ ଆର୍ଥିକ ସହାୟତା ପ୍ରଦାନ କରାଯାଇଛି ।

ଚଳିତ ୨୦୨୬-୨୭ ଆର୍ଥିକ ବର୍ଷରେ ୧୩ ଜଣ ମୃତ ସାମ୍ବାଦିକଙ୍କ ପରିବାରକୁ ପ୍ରତ୍ୟେକ ୪ ଲକ୍ଷ ଟଙ୍କା ଲେଖାଏଁ ଆର୍ଥିକ ସହାୟତା ରାଶି ମଞ୍ଜୁର କରାଯାଇଛି । ସାମ୍ବାଦିକଙ୍କ ମୃତ୍ୟୁ ପରେ ପରିବାର ଉପରେ ପଡ଼ୁଥିବା ଆର୍ଥିକ ଚାପକୁ କିଛି ମାତ୍ରାରେ କମାଇବା ଏହି ସହାୟତାର ମୁଖ୍ୟ ଉଦ୍ଦେଶ୍ୟ ।

ଏହି ସହାୟତା ରାଶି ପାଇଥିବା ସାମ୍ବାଦିକମାନଙ୍କ ମଧ୍ୟରେ ସମ୍ବାଦଦାତା, ରିପୋର୍ଟର, ନ୍ୟୁଜ୍ କଣ୍ଟ୍ରିବ୍ୟୁଟର, ପ୍ରୋଗ୍ରାମ ପ୍ରଡ୍ୟୁସର, ପ୍ରଡକ୍ସନ୍ ଏକ୍ଜିକ୍ୟୁଟିଭ୍ ଏବଂ ଅନ୍ୟାନ୍ୟ ମିଡିଆ କର୍ମଚାରୀ ରହିଛନ୍ତି । ଜାଜପୁର, ଗଞ୍ଜାମ, ମୟୂରଭଞ୍ଜ, ରାୟଗଡ଼ା, ସୁବର୍ଣ୍ଣପୁର, ଜଗତସିଂହପୁର, ସମ୍ବଲପୁର, ଖୋର୍ଦ୍ଧା ଓ କେନ୍ଦୁଝର ସମେତ ବିଭିନ୍ନ ଜିଲ୍ଲାର ମୃତ ସାମ୍ବାଦିକଙ୍କ ନିକଟତମ ସମ୍ପର୍କୀୟମାନଙ୍କୁ ଏହି ସହାୟତା ରାଶି ପ୍ରଦାନ କରାଯାଇଛି ।

ସାମ୍ବାଦିକ ଓ ସେମାନଙ୍କ ପରିବାରର କଠିନ ସମୟରେ ସହଯୋଗ କରିବା ଦିଗରେ ଏହି କଲ୍ୟାଣମୂଳକ ପଦକ୍ଷେପ ସରକାରଙ୍କ ପ୍ରୟାସକୁ ପ୍ରତିଫଳିତ କରୁଛି । ଏହି ଆର୍ଥିକ ସହାୟତା ଶୋକସନ୍ତପ୍ତ ପରିବାରଗୁଡ଼ିକୁ କିଛି ମାତ୍ରାରେ ଆର୍ଥିକ ସହଯୋଗ ପ୍ରଦାନ କରିବା ସହ ସମାଜ ଓ ଗଣମାଧ୍ୟମ କ୍ଷେତ୍ର ପ୍ରତି କାର୍ଯ୍ୟରତ ସାମ୍ବାଦିକଙ୍କ ଅବଦାନକୁ ସମ୍ମାନ ଦେବାର ଏକ ପ୍ରୟାସ ବୋଲି କୁହାଯାଇଛି ।