ରାତିରେ ଗରମରେ ରହୁଥିଲେ ସାବଧାନ!...ହୋଇପାରେ ଏହି ରୋଗ, ଗବେଷଣାରୁ ଚାଞ୍ଚଲ୍ୟକର ଖୁଲାସା
ଓଡ଼ିଆ ଗସିପ ବ୍ୟୁରୋ (ସ୍ୱତନ୍ତ୍ର ପ୍ରତିନିଧି; ଭୁବନେଶ୍ୱର,୨୪।୫): ଦିଲ୍ଲୀ ସମେତ ଦେଶର ଅନେକ ଭାଗରେ ଏଥର ଗ୍ରୀଷ୍ମ ପ୍ରବାହ କେବଳ ଦିନରେ ନୁହେଁ, ବରଂ ରାତିରେ ମଧ୍ୟ ଲୋକଙ୍କ ସ୍ବାସ୍ଥ୍ୟ ଉପରେ ଭାରି ପଡ଼ୁଛି । ପୂର୍ବରୁ ଯେଉଁଠି ରାତି ସମୟଟା ଶରୀରକୁ ଦିନସାରାର ଗରମରୁ ଆଶ୍ୱସ୍ତି ଦେଉଥିଲା, ଏବେ ବଢୁଥିବା ତାପମାତ୍ରା ରାତିରେ ମଧ୍ୟ ଶରୀରକୁ ଆରାମ ମିଳିବାକୁ ଦେଉନାହିଁ । ଡାକ୍ତର ଏବଂ ଗବେଷକମାନଙ୍କ ମତରେ, କ୍ରମାଗତ ଭାବେ ଗରମ ରହୁଥିବା ରାତି ଏବେ ହୃଦରୋଗ, ଡିହାଇଡ୍ରେସନ (ଜଳାଭାବ) ଏବଂ ଷ୍ଟ୍ରୋକ ଭଳି ଗମ୍ଭୀର ବିପଦକୁ ବଢ଼ାଇବାରେ ଲାଗିଛି ।
ପାଣିପାଗ ବିଭାଗ ଅନୁଯାୟୀ, ଦିଲ୍ଲୀରେ ତାପମାତ୍ରା ୪୫ ଡିଗ୍ରୀ ସେଲସିୟସ ପାର୍ କରିସାରିଛି ଏବଂ ଆଗାମୀ ଦିନରେ ସ୍ଥିତି ଆହୁରି ଗମ୍ଭୀର ହୋଇପାରେ। କିନ୍ତୁ ଚିନ୍ତାର ବିଷୟ କେବଳ ଦିନର ପ୍ରଖର ଖରା ନୁହେଁ। ବିଶେଷଜ୍ଞଙ୍କ କହିବା କଥା ହେଲା, ରାତିରେ ତାପମାତ୍ରା କମ ନ ହେବା ଶରୀର ପାଇଁ ଅଧିକ ବିପଜ୍ଜନକ ସାବ୍ୟସ୍ତ ହେଉଛି। ସାଧାରଣତଃ ରାତିରେ ଶରୀର ନିଜକୁ ଥଣ୍ଡା କରିଥାଏ ଏବଂ ଦିନସାରାର ଚାପରୁ ସୁଧାର (Recover) ଆଣିଥାଏ। କିନ୍ତୁ ଯେତେବେଳେ ରାତିରେ ମଧ୍ୟ ଗରମ ବଜାୟ ରହେ, ଶରୀର କ୍ରମାଗତ ଭାବେ ଚାପରେ ରହିଥାଏ।
ଗବେଷଣାରୁ ଜଣାପଡ଼ିଛି ଯେ, ଗରମ ରାତି ଯୋଗୁଁ ହୃଦରୋଗ ଏବଂ ଷ୍ଟ୍ରୋକ ଜନିତ ମୃତ୍ୟୁର ଆଶଙ୍କା ବଢ଼ିପାରେ। ‘ନ୍ୟାସନାଲ ଇନଷ୍ଟିଚ୍ୟୁଟ ଅଫ ହେଲଥ’ ସହ ଜଡ଼ିତ ଏକ ଅଧ୍ୟୟନରୁ ଜଣାପଡ଼ିଛି ଯେ, ଯେତେବେଳେ ଅତ୍ୟଧିକ ଗରମ ଦିନ ପରେ ରାତି ମଧ୍ୟ ଅସ୍ବାଭାବିକ ଭାବେ ଗରମ ରହେ, ସେତେବେଳେ ଶରୀରକୁ ଆଶ୍ୱସ୍ତି ମିଳିପାରେନାହିଁ ଏବଂ ସ୍ବାସ୍ଥ୍ୟଗତ ବିପଦ ଅନେକ ଗୁଣ ବଢ଼ିଯାଏ। ବିଶେଷ କରି ଷ୍ଟ୍ରୋକ ଏବଂ ହାର୍ଟ ଡିଜିଜ (ହୃଦରୋଗ) ର ଆଶଙ୍କା ଅଧିକ ଦେଖିବାକୁ ମିଳିଛି।
ଅଧିକ ପଢ଼ନ୍ତୁ : ପାଦରେ କାହିଁକି ବାନ୍ଧନ୍ତି କଳା ସୂତା? ରହସ୍ୟ ଜାଣିଲେ ହୋଇଯିବେ ଆଶ୍ଚର୍ଯ୍ୟ
ଦିଲ୍ଲୀ ଭଳି ବଡ଼ ବଡ଼ ସହରଗୁଡ଼ିକରେ ଅର୍ବାନ ହିଟ ଆଇଲ୍ୟାଣ୍ଡ (Urban Heat Island) ପ୍ରଭାବ ଏହି ସମସ୍ୟାକୁ ଆହୁରି ଗମ୍ଭୀର କରୁଛି। କଂକ୍ରିଟ୍ର କୋଠାବାଡ଼ି, କମ ସବୁଜିମା ଏବଂ ଖରାପ ଭେଣ୍ଟିଲେସନ ଯୋଗୁଁ ଗରମ ରାତିସାରା ଜମି ରହିଥାଏ। ଏହାର ପ୍ରଭାବ ସବୁଠାରୁ ଅଧିକ ସେହି ଲୋକମାନଙ୍କ ଉପରେ ପଡ଼ିଥାଏ, ଯେଉଁମାନେ ଛୋଟ ଘରେ କିମ୍ବା ଏୟାର କଣ୍ଡିସନର (AC) ନଥିବା ରୁମରେ ରୁହନ୍ତି। ଅନେକ ଘରେ ରାତି ସମୟରେ ମଧ୍ୟ ତାପମାତ୍ରା ୩୧ ଡିଗ୍ରୀ ସେଲସିୟସରୁ ଅଧିକ ରହୁଛି, ଯାହା ଦ୍ୱାରା ନିଦ ପ୍ରଭାବିତ ହେଉଛି ଏବଂ ଶରୀରକୁ ପର୍ଯ୍ୟାପ୍ତ ଆରାମ ମିଳିପାରୁନାହିଁ।
ଦିଲ୍ଲୀର ଡାକ୍ତରଖାନାଗୁଡ଼ିକରେ ମଧ୍ୟ ଗରମ ଜନିତ ରୋଗୀଙ୍କ ସଂଖ୍ୟା ଦ୍ରୁତ ଗତିରେ ବଢ଼ିବାରେ ଲାଗିଛି। ଡାକ୍ତର ଅରବିନ୍ଦ କୁମାର ଅଗ୍ରୱାଲଙ୍କ କହିବା ଅନୁଯାୟୀ, ଇମରଜେନ୍ସି ୱାର୍ଡରେ ଡିହାଇଡ୍ରେସନ, ହିଟ ଏକ୍ସହଷ୍ଟନ (Heat Exhaustion) ଏବଂ ହିଟ ଷ୍ଟ୍ରୋକ୍ର ପ୍ରାଥମିକ ଲକ୍ଷଣ ଥିବା ରୋଗୀଙ୍କ ସଂଖ୍ୟା ବୃଦ୍ଧି ପାଇଛି। ସେହିପରି ଡାକ୍ତର ଅତୁଲଙ୍କ କହିବା କଥା ହେଲା, ପିଲା, ବୃଦ୍ଧ ଏବଂ ହୃଦରୋଗ, ଫୁସଫୁସ କିମ୍ବା କିଡନୀ ରୋଗରେ ପୀଡ଼ିତ ଲୋକଙ୍କ ଉପରେ ଏହାର ସବୁଠାରୁ ଅଧିକ ପ୍ରଭାବ ପଡ଼ୁଛି।