ମରୁଭୂମିର ଦେଶ ମଧ୍ୟପ୍ରାଚ୍ୟରେ କଳିଯୁଗର ଆହ୍ୱାନ: ଲଗାଣ ବର୍ଷା ଯୋଗୁଁ ରାସ୍ତାରେ ଭାସିଲା କାର୍
କଳିଯୁଗ ଶେଷର ଇଏ ଖରାପ ସଂକେତ ନୁହେଁ ତ!
ଓଡ଼ିଆ ଗସିପ୍ ବ୍ୟୁରୋ: କଥାରେ ଅଛି ଜଳ ବହୁଳେ ସୃଷ୍ଟି ନାଶ,ଜଳ ବିହୁନେ ସୃଷ୍ଟି ନାଶ । କେଉଁଠି ପାଣି ପାଇଁ ଲୋକେ ଡହଳ ବିକଳ ହେଉଛନ୍ତି ତ ପୁଣି କେଉଁଠି ଲୋକେ ଜଳତାଣ୍ଡବର ଶିକାର ହୋଇ ପୋକ ମାଛି ପରି ମରୁଛନ୍ତି । ଆଉ ଠିକ୍ ଏମିତି ଏକ ଚିତ୍ର ଏବେ ମଧ୍ୟପ୍ରାଚ୍ୟରୁ ଆସିଛି । ଯେଉଁଠି ଜଳ ପ୍ରଳୟର ଯନ୍ତ୍ରଣାରେ ଛଟ ପଟ ହେଉଛି ଜୀବନ । ଏକ ରିପୋର୍ଟ....
ବିଶେଷ କରି ଦୁବାଇ ନିକଟବର୍ତ୍ତୀ ସହର ଶାରଜାହ ଓ ଫୁଜାଇରା ବେଶି ପ୍ରଭାବିତ ହୋଇଛି । ଦୁଇଟି ଯାକ ସମୁଦ୍ର ତଟବର୍ତ୍ତୀ ସହରରେ ଅକସ୍ମାତ ଅସମ୍ଭାଳ ବନ୍ୟାସ୍ଥିତି ଦେଖାଦେବା ପରେ, ଏଭଳି ବିପର୍ଯ୍ୟୟ ପାଇଁ ଅପ୍ରସ୍ତୁତ ଥିବା ଲୋକେ ତ୍ରାହି ତ୍ରାହି ଡାକୁଛନ୍ତି । ସେନା ସହାୟତାରେ ଉଦ୍ଧାର କାର୍ଯ୍ୟ ଜାରି ରହିଛି । ୮୭୦ ଲୋକଙ୍କୁ ପାଣିରୁ ଉଦ୍ଧାର କରାଯାଇଥିବା ବେଳେ, ପ୍ରାୟ ୪ ହଜାର ଲୋକଙ୍କୁ ଆଶ୍ରୟ ସ୍ଥଳରେ ରଖାଯାଇଛି । ଏବେ ସୁଦ୍ଧା ୭ ଜଣ ଲୋକଙ୍କ ମୃତ୍ୟୁ ଖବର ମିଳିଛି ଏବଂ ସମସ୍ତ ମୃତକ ପ୍ରବାସୀ ଏସୀୟ ବୋଲି ଜଣାପଡ଼ିଛି ।
ରାଜଧାନୀ ଆବୁଧାବି, ଅତ୍ୟାଧୁନିକ ସହର ଦୁବାଇ ଏବଂ ଅନ୍ୟ ସମୁଦ୍ରତଟ ସହରାଞ୍ଚଳକୁ ଛାଡ଼ିଦେଲେ, ୟୁଏଇର ପ୍ରାୟ ୮୦ ପ୍ରତିଶତ ଇଲାକା ମରୁଭୂମି ଓ ବାଲୁକାସ୍ତୁପରେ ଭର୍ତ୍ତି । ମଧ୍ୟପ୍ରାଚ୍ୟରେ ଜୁଲାଇ ମାସରେ ଏଭଳି ପ୍ରବଳ ବର୍ଷା କ୍ୱଚିତ୍ ଦେଖାଯାଏ । କୁହାଯାଉଛି, ଫ୍ଲାସ୍ଫ୍ଲଡ୍ ସୃଷ୍ଟି କରିଥିବା ଚଳିତ ବର୍ଷର ବର୍ଷା ପରିମାଣ ଗତ ୨୭ ବର୍ଷର ରେକର୍ଡ ଭାଙ୍ଗିଛି ।
ଫୁଜାଇରାରେ ୨୫୫ ମିଲିମିଟର ବର୍ଷା ରେକର୍ଡ ହୋଇଛି, ଯାହାକି ଜୁଲାଇ ମାସ ପାଇଁ ସର୍ବାଧିକ । ୟୁଏଇର ଜାତୀୟ ପାଣିପାଗ କେନ୍ଦ୍ର ରେଡ୍ ଆଲର୍ଟ ଜାରି କରିଥିବା ବେଳେ, ପୂର୍ବ ଓ ଉତ୍ତରରେ ଆହୁରି କିଛି ଦିନ ବର୍ଷା ଆଶଙ୍କା ଥିବା ଆକଳନ କରିଛି । ତେବେ କାହିଁକି ବର୍ଷାର ଏଭଳି ଅସ୍ୱାଭାବିକ ଟ୍ରେଣ୍ଡ ? କେମିତି ଜଳାର୍ଣ୍ଣବ ହେଲା ଶୁଖିଲା ପଡ଼ିଥିବା ଦେଶର ୨ ସହର ? ବିଶେଷଜ୍ଞଙ୍କ ମତରେ ଏହା ପଛରେ ରହିଛି ୨ଟି ମୁଖ୍ୟ କାରଣ । ଗୋଟିଏ ଜଳବାୟୁ ପରିବର୍ତ୍ତନ ଏବଂ ଅନ୍ୟଟି ହେଉଛି ସହରରେ ଜଳ ନିଷ୍କାସନ ଭିତ୍ତିଭୂମିର ଅଭାବ ।
ଶାରଜାହ ଓ ଫୁଜାଇରା, ବନ୍ୟା ବିତ୍ପାତ ସହ ଜୁଝୁଥିବା ବେଳେ ଅପେକ୍ଷାକୃତ ଅଳ୍ପ ବର୍ଷା ହେବା କାରଣରୁ ଆବୁଧାବି ଓ ଦୁବାଇ ଦୁର୍ବିପାକରୁ ବର୍ତ୍ତିଯାଇଛି ।
ମରୁଭୂମିରେ ଜଳପ୍ରଳୟ । ଭାସୁଛି ମଧ୍ୟପ୍ରାଚ୍ୟ ଦେଶ UAE । ଜଣାପଡ଼ୁନି, ସହର ଭିତରେ ନଦୀ ନା ନଦୀ ଭିତରେ ସହର । ଡଙ୍ଗା ଭଳି ଭାସୁଛି ମାଳମାଳ କାର୍ ଓ ଅନ୍ୟ ଯାନବାହନ । ପାଣିରେ ଅଧା ବୁଡ଼ି ରହିଛି କୋଠାବାଡ଼ି ଓ ଦୋକାନବଜାର। ଅନେକ ସ୍ଥାନରେ ଧସିଯାଇଛି ମୁଖ୍ୟ ସଡ଼କ । ମଧ୍ୟପ୍ରାଚ୍ୟର ଅନ୍ୟତମ କ୍ଷୁଦ୍ର ଅଥଚ ବିତ୍ତଶାଳୀ ଦେଶ ୟୁନାଇଟେଡ୍ ଆରବ ଏମିରେଟ୍ସ ବା ୟୁଏଇରେ ଦୁଇ ଦିନ ଧରି ପ୍ରବଳ ବର୍ଷା ହେବା ଫଳରେ ଏଭଳି ସ୍ଥିତି ଉପୁଜିଛି, ଯାହାକି ସେଠାକାର ପାଣିପାଗ ଦୃଷ୍ଟିରୁ ଅତି ବିରଳ ।