ମ୍ୟାଡମ୍ ବାସ୍ତବ ଜୀବନରେ ମୋର ପତ୍ନୀ ଥିଲେ ତ? ବାସ୍ତବତା କିଛି ଭିନ୍ନ କହି ପୁଣି ବର୍ଷାଙ୍କ ବିରୋଧରେ ଅଭିଯୋଗ ଆଣିଲେ ସାଂସଦ ଅନୁଭବ

ଓଡ଼ିଆ ଗସିପ୍ ବ୍ୟୁରୋ: ସାଂସଦ ଅନୁଭବ ମହାନ୍ତି ଟ୍ୱିଟ୍ କରି ବାରମ୍ବାର ପତ୍ନୀ ବର୍ଷାଙ୍କ ଉପରେ ନିଶାନା ସାଧିଚାଲିଛନ୍ତି । ଗତକାଲି ଅନୁଭବ ପୁଣି ଦାମ୍ପତ୍ୟ ଜୀବନକୁ ନେଇ ଅନେକ ପ୍ରଶ୍ନ କରିଛନ୍ତି । ଯାହା ବର୍ଷାଙ୍କୁ ବହୁତ ଆଘାତ ଦେଉଥିବ ବୋଲି ଚର୍ଚ୍ଚା ଜୋର ଧରିଛି ।

ନିଜ ଟ୍ୱିଟର ଆକାଉଣ୍ଟରୁ ପୁଣି ଅନୁଭବ ପତ୍ନୀ ବର୍ଷାଙ୍କ ବିରୋଧରେ ପ୍ରଶ୍ନର ବାଣ ସାଧିଛନ୍ତି । ସେ ପଚାରିଛନ୍ତି ‘ମ୍ୟାଡାମ ବାସ୍ତବ ଜୀବନରେ ମୋର ପତ୍ନୀ ହୋଇଥିଲେ ତ? ଏହା କେବଳ ଏକ ସାମାଜିକ ବିବାହ । ଏହା କେବେବି ମାନସିକ କିମ୍ବା ଶାରୀରିକ ବିବାହ ନଥିଲା । ଏହା ହିଁ ବାସ୍ତବତା । ମୁଁ ବି ଏହାକୁ ସର୍ବସାଧାରଣରେ ଲେଖି ନିଜକୁ ଲଜ୍ଜିତ ମନେକରୁଛି । ଏଥିପାଇଁ ମୁଁ ଦୁଃଖିତ ।’

ଏଥିସହିତ ଷ୍ଟାର ଦମ୍ପତ୍ତି ଦ୍ୱୟ ଅନୁଭବ ମହାନ୍ତି ଓ ବର୍ଷା ପ୍ରିୟଦର୍ଶିନୀଙ୍କ ପାରିବାରିକ ବିବାଦରେ ଏବେ ସାମାଜିକ ସଂଗଠନକୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି । କିଛି ସାମାଜିକ ସଂଗଠନର କର୍ମକର୍ତ୍ତା ଗତକାଲି ପୁଣି ନନ୍ଦୀ ସାହି ଘରକୁ ଯାଇ ଅନୁଭବକୁ ଭେଟିବା ପାଇଁ ଅନୁମତି ଚାହିଁଥିଲେ ହେଲେ ଅନୁଭବ ଦେଖା କରିବା ପାଇଁ ମନା କରିଦେଇଥିଲେ ।

ହେଲେ ବର୍ଷା ସେମାନଙ୍କୁ ଭେଟି ଆଲୋଚନା କରିବା ସହିତ ବିବାଦର ଆପୋସ ସମାଧାନ ଚାହୁଁଛନ୍ତି ବୋଲି ଦୋହରାଇଥିଲେ । ହେଲେ ପରବର୍ତ୍ତୀ ସମୟରେ ସାମାଜିକ ସଂଗଠନ କର୍ମୀଙ୍କ କାର୍ଯ୍ୟପନ୍ଥାକୁ ମିଛ ଦର୍ଶାଇ ଅନୁଭବ ସେମାନଙ୍କୁ ଛଳନା କରୁଥିବା କହି ଅଭିଯୋଗ ଆଣିଛନ୍ତି । ସେ କହିଛନ୍ତି ଏହି ସାମାଜିକ କର୍ମୀମାନେ ତାଙ୍କ ପରିବାର ସହ ଛଳନା କରିଛନ୍ତି ଏବଂ ସେମାନେ ବର୍ଷାଙ୍କ ସହିତ ରହିଛନ୍ତି ବୋଲି ଅଭିଯୋଗ ଆଣିଛନ୍ତି ।

ଅନୁଭବ ଆହୁରି ମଧ୍ୟ କହିଛନ୍ତି ଯେ, ‘ମୋତେ ମୋ ମାତୃଭୂମିର ସେବା ପାଇଁ ଛାଡ଼ି ଦିଆଯାଉ । ମୋ ଜୀବନରେ କେବେବି କୌଣସି ନାରୀ ଉପରକୁ ହାତ ଉଠାଇନାହିଁ । ମୁଁ ବି ଆପଣମାନଙ୍କ ମଧ୍ୟରୁ ଜଣେ । ମୁଁ କାହାକୁ ମିଛ କହୁନାହିଁ । ହେଲେ ଯେଉଁଭଳି ଭାବେ ମୋତେ ଟାର୍ଗେଟ କରାଯାଉଛି, ଏହା ଆଦୌ ଗ୍ରହଣୀୟ ନୁହେଁ ।’

ଅନ୍ୟପଟରେ ସାମାଜିକ ସଂଗଠନ ସଦସ୍ୟମାନେ ଅନୁଭବଙ୍କୁ ତାଙ୍କ ଘରେ ଭେଟି ନ ପାରି ଫେରିବା ପରେ କଡ଼ା ପ୍ରତିକ୍ରିୟା ରଖିଛନ୍ତି । ସେମାନେ କହିଛନ୍ତି ଯେ, ଜଣେ ସାଂସଦ ହୋଇ ନିଜ କଥା ନିଜେ ରଖିପାରୁନାହାନ୍ତି । ଗତକାଲି ଅନୁଭବ କହିଥିଲେ ଯେ, ଶୁକ୍ରବାର ସକାଳେ ବର୍ଷା ଓ ସେ ଏକାଠି ହୋଇ ସାମ୍ନାସାମ୍ନି ମାନବାଧିକାର କର୍ମୀଙ୍କ ଆଗରେ ଆପୋସ ବୁଝାମଣା ପାଇଁ ଆଲୋଚନା କରିବେ । ହେଲେ ସେ କାହିଁକି ଦେଖା କରିବାକୁ ମନା କରିଦେଲେ ତାହା ଜମା ବୁଝାପଡ଼ୁନାହିଁ ବୋଲି ସଦସ୍ୟାମାନେ କହିଥିଲେ ।