ଭାରତ ବନ୍ଦ: ପୋଡ଼ିଲେ, ଭାଙ୍ଗିଲେ, ଲୁଟିଲେ, କଲବଲ କଲେ
ଭୁବନେଶ୍ୱର: ଏନଡିଏ ନେତୃତ୍ୱାଧୀନ ବିଜେପି ସରକାର ବିରୋଧରେ ଆଜି ଏକାଠି ହୋଇଥିଲେ ବାମ ଦଳ ସହ ଜାତୀୟ ସ୍ତରର ବିରୋଧୀ ଦଳ । ଶ୍ରମିକ ଏବଂ କୃଷକ ସଂଗଠନଗୁଡ଼ିକର ଆହ୍ୱାନ କ୍ରମେ ଏହି ଦଳମାନେ ବନ୍ଦକୁ ସଫଳ କରିବାକୁ ରାସ୍ତାକୁ ଓଲ୍ହାଇଥିଲେ । 12 ଦଫା ଦାବି ନେଇ ସିଆଇଟିୟୁ (CITU) ସମେତ ଅନ୍ୟ ଶ୍ରମିକ ଓ କୃଷକ ସଂଗଠନର ନେତୃବୃନ୍ଦ ଆଜି ଭାରତ ବନ୍ଦ କରିବାକୁ ପୂର୍ବରୁ ଘୋଷଣା କରିଥିଲେ । ଯାହା ଆଜି ସାରା ଦେଶରେ ପ୍ରଭାବ ପକାଇଛି ।
କେଉଁଠି ରାସ୍ତା ଶୂନଶାନ ତ ଆଉ କେଉଁଠି ଦୋକାନ ବଜାର ବନ୍ଦ । ଆଉ କେଉଁଠି ପୋଡ଼ାଜଳା, ପାଟିତୁଣ୍ଡ ଏମିତିକି ସାଧାରଣ ଲୋକଙ୍କ ସହ କଥା କଟାକଟି । ବସଷ୍ଟାଣ୍ଡରେ ବସ୍ ଧାଡ଼ି ଧାଡ଼ି ହୋଇ ଛିଡ଼ା ହୋଇଥିଲା, କିନ୍ତୁ ନିଜ ଗନ୍ତବ୍ୟ ସ୍ଥଳକୁ ଯିବାକୁ ଚାତକ ପରି ଚାହିଁରହିଥିବା ଯାତ୍ରୀ ଭୋକ ଉପାସରେ ମୁଣ୍ଡରେ ହାତ ଦେଇ ବସିଥିଲା । ଅନ୍ୟ କେଉଁଠି ରାସ୍ତା ଉପରେ ଟାୟର ଜାଳି ପ୍ରତିଦାବ ସଭା କରାଯାଇଥିଲା ତ କେଉଁଠି ନେତାମାନଙ୍କୁ ପୋଲିସ ବୁଝାସୁଝା କରିବା ପରେ ସ୍ଥିତି ଆୟତକୁ ଆସୁଥିଲା । କେଉଁଠି କେଉଁଠି ତ ସ୍ଥିତି ଅଣାୟତ ହେବା ପୂର୍ବରୁ ନେତାମାନଙ୍କୁ ଗିରଫ କରି ନେଇଥିଲା ପୋଲିସ । ଭାରତ ବନ୍ଦ ଖବର ଜାଣିନଥିବା ବହୁ ଯାତ୍ରୀ, ପର୍ଯ୍ୟଟକ ଆଜି ଅଧିକ ହଇରାଣ ହରକତ ହୋଇଥିଲେ ।
ରାଜଧାନୀର ତିନି ପ୍ରମୁଖ ସ୍ଥାନରେ ଆଜି ଚିତ୍ର ବେଶ୍ ହୃଦୟ ବିଦାରକ ଥିଲା । ବରମୁଣ୍ଡା ବସଷ୍ଟାଣ୍ଡରେ ବାହାର ରାଜ୍ୟରୁ ଘରକୁ ଫେରିଥିବା ଯାତ୍ରୀ ଗାଁକୁ ଯିବାକୁ ଡହଳ ବିକଳ ହେଉଥିବାର ଦେଖିବାକୁ ମିଳିଥିଲା । ଏପରିକି ବସଷ୍ଟାଣ୍ଡରେ ଦୋକାନ ବଜାର ବନ୍ଦ ରହିଥିବାରୁ ଭୋକ ଉପାସରେ ଦିନ ବିତାଇଥିଲେ ଯାତ୍ରୀ । ଅଟୋ ଭଡ଼ା କରି ବାହାରକୁ ଯିବାକୁ ସମ୍ବଳ ନାହିଁ ଯଦି ବା ମିଳୁଥିବା ଅଟୋ ଭଡ଼ା ବି ଆକାଶ ଛୁଆଁ । ଅନ୍ୟ ଅର୍ଥ ରେ କହିବାକୁ ଗଲେ ଅଟୋ ଚାଳକ ଯାତ୍ରୀମାନଙ୍କୁ ଲୁଟି ଥିବା ଜଣାପଡ଼ିଛି ।
ସେପଟେ ରେଳ ଷ୍ଟେସନରେ ବି ସମାନ ଅବସ୍ଥା । ଟ୍ରେନ ଚଳାଚଳ ବାଧାପ୍ରାପ୍ତ ହୋଇଥିବାରୁ ଦେଖାଦେଇଥିଲା ଗୁରୁତର ସମସ୍ୟା । ବିମାନ ବନ୍ଦରରେ ମଧ୍ୟ ଚିତ୍ର ଥିଲା ଅତି ସମ୍ବେଦନଶୀଳ । ବିମାନ ବନ୍ଦରରୁ ବାହାରକୁ ଯିବାକୁ ନା ଅଛି କିଛି ବ୍ୟବସ୍ଥା ନା ଉପାୟ ।
ସେପଟେ ରାଉରକେଲାରେ ବନ୍ଦ ପାଳନ ବେଳେ ଏକ ମାଛ ବୋଝେଇ ପିକ୍ଅପ୍ ଭ୍ୟାନ ଓଲଟି ପଡ଼ିବାରୁ ରାସ୍ତା ଉପରେ ମାଛ ଗୁଡ଼ିକ ଛଟପଟ ହେଉଥିବାର ଦୃଶ୍ୟ ବିଭିନ୍ନ ଗଣମାଧ୍ୟମରେ ପ୍ରସାରିତ ହୋଇଥିଲା ।
ବନ୍ଦ ଡାକରାକୁ ଦୃଷ୍ଟିରେ ରଖି ଆଜି ବିଭିନ୍ନ ଜିଲ୍ଲାରେ ସ୍କୁଲ ଛୁଟି ଘୋଷଣା କରାଯାଇଛି। କନ୍ଧମାଳ, ଗଞ୍ଜାମ, ଢେଙ୍କାନାଳ, ଖୋର୍ଦ୍ଧା, ଭଦ୍ରକ, ଗଜପତି ଜିଲ୍ଲାରେ ସ୍କୁଲ ଛୁଟି ଘୋଷଣା କରାଯାଇଛି । ସେହିପରି ଜଗତସିଂହପୁର, ରାୟଗଡ଼ା, ଝାରସୁଗୁଡ଼ା, ନୟାଗଡ଼, ଯାଜପୁର, ମାଲକାନଗିରି, କେନ୍ଦ୍ରାପଡ଼ା ଜିଲ୍ଲାରେ ମଧ୍ୟ ସବୁ ସ୍କୁଲ ଛୁଟି ଘୋଷଣା କରାଯାଇଛି। ବନ୍ଦ ବେଳେ ସତର୍କତା ଦୃଷ୍ଟିରୁ ଏହି ଛୁଟି ଘୋଷଣା କରାଯାଇଥିବା ସଂପୃକ୍ତ ଜିଲ୍ଲାପାଳ ସୂଚନା ଦେଇଛନ୍ତି।
Share this story
