ଭାରତରେ ବଢି ଚାଲିଛି ଭାଇରସର ପାଦୁର୍ଭାବ, କାହିଁକି ସ୍ଥିତି ବେକାବୁ ଜାଣନ୍ତୁ…

ଓଡ଼ିଆ ଗସିପ୍ ବ୍ୟୁରୋ: ବିଶ୍ୱବ୍ୟାପି କୋଭିଡ୍ ମାମଲାରେ ଏବେ ଭାରତ ବହୁ ଦେଶକୁ ପଛରେ ପକାଇ ଚତୁର୍ଥ ସ୍ଥାନକୁ ଚାଲି ଆସିଛି । ଇଂଲଣ୍ଡ୍‌କୁ ଟପି ବିଶ୍ବର ଚତୁର୍ଥ ସ୍ଥାନରେ ପହଞ୍ଚିଛି । ପ୍ରଥମ ସ୍ଥାନରେ ଆମେରିକା, ଦ୍ୱିତୀୟରେ ବ୍ରାଜିଲ୍, ତୃତୀୟରେ ଋଷିଆ ଓ ଚତୁର୍ଥରେ ଭାରତ ରହିଛି । ଆମେରିକାରେ କରୋନାରେ ଆକ୍ରାନ୍ତଙ୍କ ସଂଖ୍ୟା ୨୦ଲକ୍ଷ ପାର୍‌ କରିଥିବା ବେଳେ ବ୍ରାଜିଲ୍‌ରେ ୮ଲକ୍ଷ ପାର୍‌ ହୋଇଛି । ସେହିପରି ଋଷିଆରେ ୫ଲକ୍ଷ ଅତିକ୍ରମ କରିଛି ଆକ୍ରାନ୍ତଙ୍କ ସଂଖ୍ୟା ।

ଭାରତରେ ୨ଲକ୍ଷ ୯୭ହଜାର ୫୩୫ଜଣ କରୋନାରେ ଆକ୍ରାନ୍ତ ହୋଇଛନ୍ତି । ବ୍ରିଟେନ୍‌ ପଞ୍ଚମ ସ୍ଥାନରେ ରହିଛି । ବ୍ରିଟେନ୍‌ରେ କରୋନା ଆକ୍ରାନ୍ତଙ୍କ ସଂଖ୍ୟା ୨ଲକ୍ଷ ୯୧ହଜାରରୁ ଅଧିକ ରହିଛି ।

ଗତ ୨୪ ଘଣ୍ଟାରେ ଭାରତରେ ସର୍ବାଧିକ ୧୦,୯୫୬ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୩୯୬ଜଣଙ୍କ ମୃତ୍ୟୁ ଘଟିଛି । ଯାହା ଏବେ ଚିନ୍ତାଜନକ ବିଷୟ ପାଲଟିଛି ।

କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ଦେଶରେ ଏଯାବତ୍‌ ୨ଲକ୍ଷ ୯୭ହଜାର ୫୩୫ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଆକ୍ରାନ୍ତଙ୍କ ମଧ୍ୟରୁ ୧,୪୭,୧୯୫ଜଣ ସୁସ୍ଥ ହୋଇଥିବା ବେଳେ ୧,୪୧,୮୪୨ଜଣ ଚିକିତ୍ସାଧୀନ ଅଛନ୍ତି । ବର୍ତ୍ତମାନ ସୁଦ୍ଧା ୮,୪୯୮ଜଣଙ୍କ ମୃତ୍ୟୁ ଘଟିଛି ।

ସେପଟେ ଦେଶରେ କୋଭିଡ୍-୧୯ ସଂକ୍ରମଣ ଦ୍ରୁତ ବେଗରେ ବୃଦ୍ଧି ପାଉଥିବାରୁ ଅନ୍‌ଲକ୍ ୧.୦ ସମୟରେ ଦିଆଯାଇଥିବା କୋହଳକୁ କେତେକ ରାଜ୍ୟ ପୁଣି ପ୍ରତ୍ୟାହାର କରିନେବାକୁ ନିଷ୍ପତ୍ତି ନେଇଥିବା ବେଳେ ଅନ୍ୟ କେତେକ ରାଜ୍ୟ ସମ୍ପୂର୍ଣ୍ଣ ସଟ୍‌ଡାଉନ୍ କଥା ବିଚାର କରୁଛନ୍ତି ।

ପଞ୍ଜାବରେ ସଂକ୍ରମଣ ସଂଖ୍ୟା ବୃଦ୍ଧି ପାଉଥିବାରୁ ଗୁରୁବାର ଦିନ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ହପ୍ତାହନ୍ତ ଏବଂ ସର୍ବସାଧାରଣ ଛିଟି ଦିବସମାନଙ୍କରେ କଠୋର ଲକ୍‌ଡାଉନ୍ କଟକଣା ଜାରି ପାଇଁ ଆଦେଶ ଦେଇଛନ୍ତି । କେବଳ ଇପାସ୍‌ଧାରୀମାନଙ୍କୁ ଯାତାୟାତ ପାଇଁ ଅନୁମତି ମିଳିବ । ଡାକ୍ତରୀ କର୍ମଚାରୀ ଏବଂ ଅତ୍ୟାବଶ୍ୟକ ସେବା ପ୍ରଦାନକାରୀଙ୍କ ବ୍ୟତୀତ ସମସ୍ତ ନାଗରିକ ଗୋଟିଏ ଆପ୍‌ରୁ ଏହି ଇ-ପାସ୍ ଡାଉନ୍‌ଲୋଡ୍ କରିପାରିବେ ।

କିନ୍ତୁ, ଶିଳ୍ପ କ୍ଷେତ୍ର ସ୍ବାଭାବିକ ଭାବେ କାର୍ଯ୍ୟ କରିବ ବୋଲି ମୁଖ୍ୟମନ୍ତ୍ରୀ ସିଂହ କହିଛନ୍ତି । ଦିଲ୍ଲୀରୁ ପଞ୍ଜାବକୁ ପ୍ରବେଶ କରୁଥିବା ଲୋକମାନଙ୍କୁ ବାଧ୍ୟତାମୂଳକ ଭାବେ କରୋନା ଭାଇରସ୍ ସଂକ୍ରମଣ ପରୀକ୍ଷା କରାଇବାକୁ କିଛି ଉପାୟ ପ୍ରବର୍ତ୍ତନ କରିବାକୁ ମୁଖ୍ୟମନ୍ତ୍ରୀ ସିଂହ ଡାକ୍ତରୀ ବିଶେଷଜ୍ଞମାନଙ୍କୁ କହିଛନ୍ତି । ଜାତୀୟ ରାଜଧାନୀ ଅଞ୍ଚଳରୁ ପ୍ରତିଦିନ ପଞ୍ଜାବ ମଧ୍ୟକୁ ୫୦୦ ରୁ ୮୦୦ ଯାନବାହନ ପ୍ରବେଶ କରୁଛି ।

ଚେନ୍ନାଇରେ କୋଭିଡ୍-୧୯ ସଂକ୍ରମଣ ବୃଦ୍ଧି ପାଉଥିବାରୁ ଗୁରୁବାର ଦିନ ମାଡ୍ରାସ୍ ହାଇକୋର୍ଟ ତାମିଲନାଡୁ ସରକାରଙ୍କୁ କହିଛି ଯେ, କେବଳ ଚେନ୍ନାଇ ସହରକୁ ଲକ୍‌ଡାଉନ୍‌ରେ ରଖି ନ ହେବ କାହିଁକି? ଏହାର ଜବାବ ଶୁକ୍ରବାର ସୁଦ୍ଧା ଦାଖଲ କରିବାକୁ ଅଦାଲତ ରାଜ୍ୟ ସରକାରଙ୍କୁ କହିଛନ୍ତି ।

ଝାଡ଼ଖଣ୍ଡରେ କରୋନା ଭାଇରସ୍ ସଂକ୍ରମଣ ବୃଦ୍ଧି ପାଉଥିବାରୁ ସେଠାକାର ଶାସକ ମେଣ୍ଟର ସଦସ୍ୟ କଂଗ୍ରେସ ମଧ୍ୟ ମୁଖ୍ୟମନ୍ତ୍ରୀ ହେମନ୍ତ ସୋରେନ୍‌କୁ ସମ୍ପୂର୍ଣ୍ଣ ଲକ୍‌ଡାଉନ୍ ପାଇଁ କହିଛି ।

କେରଳ ସରକାର ମଧ୍ୟ କଣ୍ଟେନ୍‌ମେଣ୍ଟ୍ ଜୋନ୍‌ରେ କଠୋର କଟକଣା ପାଇଁ ଉପାୟ ଚିନ୍ତା କରୁଛନ୍ତି ।