ଫସିବେ କି କ୍ରିକେଟର ବିରାଟ କୋହଲି? ତାଙ୍କୁ ଗିରଫ ଦାବିରେ ହାଇକୋର୍ଟରେ ପିଟିସନ୍ ଦାଖଲ…

ଓଡ଼ିଆ ଗସିପ୍ ବ୍ୟୁରୋ: ଆଡ଼ୁଆରେ କ୍ରିକେଟର ବିରାଟ କୋହଲି । ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଓ ଅଭିନେତ୍ରୀ ତମନ୍ନା ଭାଟିଆଙ୍କ ନାମରେ ମାଡ୍ରାସ ହାଇକୋର୍ଟରେ ଏକ ପିଟିସନ୍ ଦାଖଲ ହୋଇଛି ।

‘ଅନଲାଇନ୍ ଜୁଆ’ର ପ୍ରସାର ପ୍ରଚାରରେ ସଂପୃକ୍ତ ଥିବାରୁ ଉଭୟଙ୍କୁ ଗିରଫ କରାଯାଉ ବୋଲି ଆବେଦନକାରୀ ଜଣଙ୍କ ଦାବି କରିଛନ୍ତି ।

ସାଧାରଣତଃ କ୍ରୀଡ଼ାବିତ ହୁଅନ୍ତୁ ଅବା ଅଭିନେତା/ ଅଭିନେତ୍ରୀଙ୍କର ଷ୍ଟାଇଲ, ଫିଟନେସଙ୍କୁ ଯୁବ ପିଢ଼ି ଅନୁକରଣ କରିଥାନ୍ତି । ସୋସିଆଲ ମିଡିଆରେ ସେମାନଙ୍କର ଅନୁଗାମୀ ପାଲଟି ଯାଆନ୍ତି ।

ଯେଉଁମାନଙ୍କର ଅଧିକ ପ୍ରଶଂସକ ସେହି ସେଲିବ୍ରିଟିଙ୍କୁ ଅଧିକ ବିଜ୍ଞାପନ କରିବାର ସୁଯୋଗ ମିଳେ । ବିଜ୍ଞାପନ ସହ ଯୁବ ପିଢ଼ି ନିଜ ନିଜର ଫେବରିଟ୍ ସେଲିବ୍ରିଟିଙ୍କୁ ଦେଖିବା ପରେ ସେହି ଜିନିଷ ପ୍ରତି ଅଧିକ ଆଗ୍ରହୀ ହୋଇଥାନ୍ତି । ତାହା ବେଳେବେଳେ ପ୍ରଶଂସକଙ୍କୁ ଘୋର ସମସ୍ୟାରେ ପକାଇଥାଏ ।

କୋହଲି ଓ ତମନ୍ନାଙ୍କ ନାମରେ ଯେଉଁ ଅଭିଯୋଗ ହୋଇଛି ସେମାନେ ଏମିତି ଆପ୍‌ର ବିଜ୍ଞାପନ କରୁଛନ୍ତି, ଯେଉଁ ଆପ୍‌ରେ ଜଣେ ଲକ୍ଷ ଲକ୍ଷ ଟଙ୍କା ଜିତି ପାରିବ । ଯାହାକୁ ଅଭିଯୋଗକାରୀ ‘ଅନଲାଇନ୍ ଜୁଆ’ ବୋଲି ନାମିତ କରି ହାଇକୋର୍ଟ ଏହା ଉପରେ ବାସନ୍ଦ ଲଗାନ୍ତୁ ବୋଲି ଦାବି ଉଠାଇଛନ୍ତି ।

ଟାଇମ୍ ନାଓର ରିପୋର୍ଟ ଅନୁସାରେ, ଚେନ୍ନାଇର ଜଣେ ଆଇନଜୀବୀ ଉଭୟ ସେଲିବ୍ରିଟିଙ୍କ ନାମରେ ହାଇକୋର୍ଟରେ ପିଟିସନ କରିଛନ୍ତି । କୋହଲି ଓ ତମନ୍ନା ଯେଉଁ ଆପ୍‌ର ପ୍ରଚାର ପ୍ରସାର କରୁଛନ୍ତି ଯୁବପିଢ଼ି ଏହା ଦ୍ୱାରା ବହୁ ମାତ୍ରାରେ ପ୍ରଭାବିତ ।

ଆପ୍ ବ୍ୟବହାର କରି ସବୁ କିଛି ହରାଇବା ଏବଂ ଊଣଗ୍ରସ୍ତ ହେବା ପରେ ଯୁବକମାନେ ଆତ୍ମହତ୍ୟା କରୁଛନ୍ତି । ତାମିଲନାଡ଼ୁରେ ଏମିତି ବହୁ ମାମଲା ନଜରକୁ ଆସିଲାଣି । ତେଣୁ ହାଇକୋର୍ଟ ଏହି ଆପ୍ ଉପରେ ବାସନ୍ଦ ଲଗାନ୍ତୁ ଏବଂ ଉଭୟ ସେଲିବ୍ରିଟିଙ୍କୁ ଗିରଫ ପାଇଁ ନିର୍ଦ୍ଦେଶ ଦିଅନ୍ତୁ ବୋଲି ଆବେଦନକାରୀ ପିଟିସନରେ ଉଲ୍ଲେଖ କରିଛନ୍ତି ।